ឃាត់ខ្លួនជនជាតិបរទេសប្រុសស្រី ច្រើននាក់ នៅទីតាំងហាងម៉ាស្សាមួយកន្លែង ស្លាកយីហោជាអក្សរចិន ប្រែថា ( ឈូងសមុទ្រក្រអូប )

ភ្នំពេញ៖ កាលពី ថ្ងៃទី៦ ខែមីនា ឆ្នាំ២០២២ ជនជាតិបរទេសប្រុសស្រីប្រមាណជា២០នាក់ត្រូវបានកម្លាំងកងរាជអាវុធហត្ថរាជធានីភ្នំពេញធ្វើការឃាត់ខ្លួននៅទីតាំងហាងម៉ាស្សាមួយកន្លែងដែលមានស្លាកយីហោជាអក្សរចិន ប្រែថា ( ឈូងសមុទ្រក្រអូប ) ស្ថិតនៅតាមបណ្តោយផ្លូវលេខ១៧២ សង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ។ ហ៊ុមព័ទ្ធនូវខ្សែរង្វង់ប្រតិបត្តិការដោយយករថយន្តមកចំនួន៣គ្រឿងមកចតនៅផ្នែកខាងក្រៅ រួមមានរថយន្តទ្រុងដែក រថយន្តក្រុងខ្នាតតូចនៃកងរាជអាវុធហត្ថ និងរថយន្តសង្គ្រោះនៃទីបញ្ជាការកងរាជអាវុធហត្ថរាជធានីភ្នំពេញ ។
នៅមុនពេលចុះឡោមព័ទ្ធទីតាំងនេះ កម្លាំងកងរាជអាវុធហត្ថបានធ្វើការស្រាវជ្រាវដើម្បីកំណត់ឱ្យបានច្បាស់នូវមុខសញ្ញានៃបទល្មើស រហូតឈានដល់ការបើកប្រតិបត្តិការបង្ក្រាបតែម្តង។ ការចុះឡោមព័ទ្ធទីតាំងបម្រើផ្លូវភេទខាងលើនេះបានបញ្ជាប់នៅវេលាម៉ោង១២និង៣០នាទីរំលងអធ្រាត្រ ឈានចូលថ្ងៃទី៦ ខែមីនា ឆ្នាំ២០២២ ដោយឃាត់ខ្លួនមនុស្សប្រុសស្រីជាជនជាតិបរទេសប្រមាណ២០នាក់រួមទាំងសម្ភារប្រើប្រាស់មួយចំនួនទៀតដែលមាននៅក្នុងហាងម៉ាស្សាខាងលើហើយសង្ស័យថាពាក់ព័ន្ធលួចបង្កប់នូវសេវាកម្មផ្លូវភេទ។ កម្លាំងកងរាជអាវុធហត្ថបាននាំខ្លួនមនុស្សប្រុសស្រីទាំងនេះទៅកាន់មូលដ្ឋានកងរាជអាវុធហត្ថរាជធានីភ្នំពេញ ដើម្បីធ្វើការសួរនាំ និងចាត់ការទៅតាមនីតិវិធីច្បាប់ ៕