គ្រោះថ្នាក់ចរាចរណ៍ រវាងរថយន្ត និងម៉ូតូបុកគ្នា មនុស្ស ២នាក់ បានរងរបួសធ្ងន់

កែប៖ គ្រោះថ្នាក់ចរាចរណ៍នេះ ផ្តើមឡើងដោយសារភាគីទាំងសងខាង បើកបរខ្វះការប្រុងប្រយ័ត្ន ខណៈរថយន្តដឹកដីនៅខាងមុខបត់ឆ្វេង តែចៃដន្យស្រាប់តែម៉ូតូ C125 ជែងពីក្រោយរថយន្តមិនបានពិនិត្យ ពីស្ថានភាពគ្រោះថ្នាក់នៅចំពោះមុខ គាប់ជួនពេលរថយន្តបត់ឆ្វេង ភាគីម៉ូតូក៏បើកទៅបុកចំកង់រថយន្តផ្នែកខាងមុខ បណ្តាលឲ្យរងរបួសបាក់ជើងទាំងពីរនាក់តែម្តង ហើយម៉ូតូរងការខូចខាតយ៉ាងធ្ងន់ធ្ងរ ផងដែរ។
មនុស្ស ២នាក់ បានរងរបួសធ្ងន់ ក្នុងករណីគ្រោះថ្នាក់ចរាចរណ៍ ជិះម៉ូតូទៅប៉ះទង្គិចជាមួយរថយន្ត ប្រភេទបែនដឹកដីខ្នាតធំ ក្នុងទិសដៅស្របគ្នា។ ហេតុការណ៍នេះ បានកើតឡើងនៅវេលា ៧និង ៥០នាទីព្រឹកថ្ងៃទី ១១ ខែមីនា ឆ្នាំ ២០២២ ត្រង់ចំណុចខាងកើតផ្សារដំណាក់ចង្អើរ ក្នុងភូមិដំណាក់ចង្អើរ សង្កាត់ព្រៃធំ ក្រុង/ខេត្តកែប លើកំណាត់ផ្លូវជាតិលេខ ៣៣។
ភាគីម៉ូតូជិះគ្នា ២នាក់សុទ្ធតែជាយុវជន ដែលមានអាយុក្រោម ២០ឆ្នាំ ដែលគេដឹងថា ធ្វើដំណើរមកពីខេត្តព្រះសីហនុ តែពេលនេះមិនទាន់ស្គាល់ឈ្មោះ ខណៈពេលសមត្ថកិច្ចប្រញាប់ប្រញាល់ ដឹកបញ្ជូនទៅសង្គ្រោះនៅឯមន្ទីរពេទ្យ។ សមត្ថកិច្ចបានចុះមកអន្តរាគមន៍ ដោយយករថយន្តរបស់អធិការដ្ឋាននគរ បាលក្រុងកែប ដឹកបញ្ជូនទៅសង្គ្រោះភ្លាមៗ នៅមន្ទីរពេទ្យ៕