គ្រោះថ្នាក់ចរាចរណ៍ ឡានដឹកដីបុក រួចកិនក្មេងស្រីសិស្សសាលាម្នាក់ស្លាប់ ចំណែកម្ដាយរងរបួសធ្ងន់ ក្រុងតាខ្មៅ

កណ្តាល៖ កាលពី យប់ ថ្ងៃសុក្រ ទី១១ ខែមិនា ឆ្នាំ២០២២នេះ នៅចំណុចផ្លូវលំជាប់គល់ស្ពានអាកាស(ទួលក្រសាំង) ត្រើយខាងលិច ស្ថិតក្នុងភូមិទួលក្រសាំង សង្កាត់រកាខ្ពស់ ក្រុងតាខ្មៅ ខេត្តកណ្ដាល ។ ស្ត្រីជាម្ដាយជិះម៉ូតូទៅដឹកកូនចេញពីរៀនអង់គ្លេសត្រលប់មកវិញជិតផ្ទះហើយ បែរជាត្រូវរថយន្តដឹកខ្សាច់ (កណ្ដាល 3A-2213) បើកបុកកិនអូសទាំងមនុស្សទាំងម៉ូតូ បណ្ដាលឲ្យកូនស្រីវ័យ១២ឆ្នាំស្លា.ប់ក្រោមក.ង់រថយន្ត និងម្ដាយរបួ.សធ្ង.ន់ ត្រូវបានបញ្ជូនទៅសង្គ្រោះនៅមន្ទីរពេទ្យ ចំណែកតៃកុងឡានចុះគេចខ្លួនបាត់ ។
ជនរងគ្រោះដែលជាកូនមានឈ្មោះ ដួង សុវណ្ណមករា ភេទស្រី អាយុ១២ឆ្នាំ មុខរបរសិស្ស បានស្លាប់ភ្លាមៗនៅកន្លែងកើតហេតុ និងជនរងគ្រោះជាម្ដាយមានឈ្មោះ ខុម សុខឡាយ ភេទស្រី អាយុ៣៤ឆ្នាំ បានរងរបួសធ្ងន់ ។ ជនរងគ្រោះទាំងពីរនាក់ជិះម៉ូតូឌ្រីមសង់មួយគ្រឿង ពណ៍ខ្មៅ ពាក់ស្លាកលេខភ្នំពេញ 1FK-0600 មានទីលំនៅភូមិទួលក្រសាំង សង្កាត់រការខ្ពស់ ក្រុងតាខ្មៅ ខេត្តកណ្ដាល ។ ចំណែករថយន្តបង្កម៉ាក Hyandai ដឹកខ្សាច់ ពាក់ស្លាកលេខកណ្ដាល 3A-2213 (បេីកបរដោយមនុស្សមិនស្គាល់អត្តសញ្ញាណ) ។
នៅមុនពេលកើតហេតុ ស្ត្រីជាម្ដាយបានជិះម៉ូតូឌ្រីមសង់មួយគ្រឿង ចេញពីផ្ទះនៅក្នុងភូមិទួលក្រសាំង(ជិតកន្លែងកើតហេតុ) ដោយធ្វើដំណើរទៅយកកូនចេញពីរៀនភាសារអង់គ្លេស រួចដឹកគ្នាត្រលប់ទៅផ្ទះវិញ ដោយធ្វើតាមបណ្តោយផ្លូវដី(អែបគល់ស្ពានអាកាសទួលក្រសាំង) ទិសដៅពីកើតទៅលិច លុះមកដល់ចំណុចកើតហេតុ ស្រាប់តែមានរថយន្តដឹកខ្សាច់ធុនធំមួយគ្រឿងនេះ បើកបញ្ច្រាសទិសទៅបុកជាមួយម៉ូតូរបស់ជនរងគ្រោះកំពុងជិះដឹកគ្នា បណ្ដាលឲ្យដួលហើយកិនអូសទាំងមនុស្សទាំងម៉ូតូជាច្រើនម៉ែត្រទៀត ទើបឈប់ ឃើញសភាពមិនស្រួលតៃកុងរថយន្តបង្កបានចុះរត់គេចខ្លួនបាត់ស្រមោល ។
ចំណែកសព ត្រូវបានសមត្ថកិច្ចធ្វើកំណត់ហេតុ រួចប្រគល់ឲ្យក្រុមគ្រួសារសាច់ញាតិមកទទួលកទៅធ្វើបុណ្យតាមប្រពៃណី៕