គ្រោះថ្នាក់ចរាចរណ៍ រវាងម៉ូតូសណ្ដោងរ៉ឺម៉កបុកជាមួយរថយន្ត បណ្ដាលឱ្យរងការខូចខាត ចំណែករ៉ឺម៉កក្រឡាប់ផ្ងារជើងច្រងាង

ភ្នំពេញ: កាលពី រសៀល ថ្ងៃទី១៤ ខែមីនា ឆ្នាំ២០២២ ស្ថិតនៅតាមបណ្តោយផ្លូវសហព័ន្ធរូស្ស៊ី ភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។
មុនដំបូងគេបានឃើញរថយន្តព្រូសពណ៌សមួយគ្រឿង ពាក់ស្លាកលេខ ភ្នំពេញ 2AR-2155 បើកបរក្នុងទិសដៅពីកើតទៅលិចមកដល់ចំណុចកើតហេតុ បានបត់ឆ្វេងចូលក្នុងអាកាសយាន្តដ្ឋានអន្តរជាតិភ្នំពេញ ស្របពេលនោះមានម៉ូតូសណ្ដោងរ៉ឺម៉កដឹកហ្គាសមួយគ្រឿង បើកបរដោយបុរសម្នាក់មានទិសដៅពីលិចទៅកើត ក៏បានជ្រុលទៅបុកយ៉ាងពេញទំហឹង បណ្ដាលឲ្យរងការខូចខាត ចំណែករ៉ឺម៉កក្រឡាប់ផ្ងារជើងតែម្តង។ សមត្ថកិច្ចមូលដ្ឋាន បានចុះដល់ទីតាំងកើតហេតុឲ្យភាគីទាំងសងខាង ធ្វើការសម្របសម្រួលគ្នាមួយចំនួនសិន បើមិនត្រូវគ្នានិងវាស់វែងយកទៅរក្សាទុកដើម្បីរង់ចាំការដោះស្រាយបន្ត៕