គ្រោះអគ្គីភ័យបានឆាបឆេះទីតាំងលក់ទំនិញ ( ម៉ាត) នៅក្នុង បុរី ជីប ម៉ុង ចំពោះមូលហេតុសមត្ថកិច្ចកំពុងស្រាវជ្រាវ

ភ្នំពេញ ៖ កាលពីវេលាម៉ោងប្រមាណ៨ព្រឹក ថ្ងៃទី១៦ ខែមីនា ឆ្នាំ២០២២ ករណីគ្រោះអគ្គីភ័យមួយបានឆាបឆេះទីតាំងលក់ទំនិញ ( ម៉ាត) នៅក្នុង បុរី ជីប ម៉ុង (២៧១) បង្កការភ្ញាក់ផ្អើលដល់អាជ្ញាធរមូលដ្ឋាន និងសមត្ថកិច្ចជំនាញចុះអន្តរាគមន៍ភ្លាមៗ បូរី ជីបម៉ុងលែនម៉ាក ២៧១ ផ្លូវ ខមមើសល ផ្ទះលេខ ៣២៣ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។

សមត្ថកិច្ចបានឲ្យដឹងថា ម្ចាស់ទីតាំងឈ្មោះ: ប៊ុន លិការ ភេទស្រី អាយុ ២៧ឆ្នាំ មុខរបរ:អ្នកលក់ក្រដាសសែនចូលឆ្នាំចិន ។ប្រភេទសំណង់: ថ្មប៉េតុង ទំហំ ៤ម៉ែត្រ x ១៦ម៉ែត្រ ។ ដោយការខូចខាតសម្ភារៈ: រថយន្ត ០២គ្រឿង(ម៉ាកតូយូតា តាកូម៉ា ពាក់ផ្លាកលេខភ្នំពេញ ២AE៧៤៣៩ ម៉ាកតូយូតាកូរូឡា ពាក់ផ្លាកលេខភ្នំពេញ ២AB៩៣៦៣ )សម្ភារៈសំរាប់លក់ដូរអស់ទាំងស្រុង នឹងពុំបណ្ដាលឲ្យឆេះរាលដាលដល់ផ្ទះអ្នកក្បែរខាងឡើយ ។

ក្រោយពីទទួលបានព័ត៌មានអំពីគ្រោះអគ្គីភ័យឆាបឆេះផ្ទះប្រជាពលរដ្ឋភ្លាម អាជ្ញាធរសមត្ថកិច្ចខណ្ឌមានជ័យ បានសហការជាមួយមន្ត្រីជំនាញការិយាល័យរថយន្ត បង្ការ សង្គ្រោះ និង ពន្លត់អគ្គីភ័យ នៃស្នងការដ្ឋាននគរបាល រាជធានីភ្នំពេញ ឲ្យបញ្ចេញរថយន្តពន្លត់អគ្គីភ័យជាច្រើនគ្រឿងដើម្បីជួយបាញ់ទឹកពន្លត់ ទើបមួយសន្ទុះក្រោយមកអណ្តាតភ្លើងក៏រលត់ទៅវិញនាព្រឹកថ្ងៃដដែល ដោយការខិតខំប្រឹងប្រែងរបស់មន្ត្រីជំនាញជាច្រើននាក់ ។

ក្នុងករណីអគ្គីភ័យនេះ មន្ត្រីជំនាញការិយាល័យរថយន្ត បង្ការ សង្គ្រោះ និង ពន្លត់អគ្គីភ័យ នៃស្នងការដ្ឋាននគរបាល រាជធានីភ្នំពេញ បញ្ជាក់ថា ពាកព័ន្ធហេតុការគ្រោះអគ្គីភ័យនេះសមត្ថកិច្ចជំនាញគ្រប់គ្រងបានទាំងស្រុងហើយ ដោយមិនបណ្ដាលឲ្យមនុស្សរងរបួស ឬគ្រោះថ្នាក់អ្វីឡើយ ។ ចំពោះមូលហេតុសមត្ថកិច្ចកំពុងស្រាវជ្រាវបន្ត ៕