មនុស្សប្រុសស្រីមួយក្រុមសង្ស័យស្រវឹងស្រា បើករថយន្តមួយគ្រឿងជ្រុលចង្កូតទៅបុកបង្គោលភ្លើងធ្វើអំពីថ្មមួយដើម និងរថយន្តមួយគ្រឿងចតស្ងៀម បណ្តាលឱ្យរងការខូចខាតយ៉ាងដំណំ

ភ្នំពេញ ៖ កាលពី ថ្ងៃទី១៩ ខែមីនា ឆ្នាំ២០២២នៅចំណុចមុខផ្សារម៉ាក្រូតាមបណ្ដោយផ្លូវលេខ១០០៣ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

មុនកើតហេតុគេឃើញមានមនុស្សប្រុសស្រីមួយក្រុមមានគ្នា៣ទៅ៤នាក់ជិះរថយន្តTOYOTA HILUX VIGO មួយគ្រឿងពណ៌ស្ករពាក់ស្លាកលេខភ្នំពេញ2I-6975ធ្វើដំណើរតាមបណ្តោយផ្លូវលេខ១០០៣ពីត្បូងទៅជើងក្នុងល្បឿនលឿន លុះមកដល់ចំណុចកើតហេតុខាងលើស្រាប់តែរេចង្កូតមកខាងស្ដាំដៃជ្រុលទៅបុកបង្គោលថ្មមួយដើមពេញទំហឹង រួចហើយបន្តទៅបុករថយន្តឡិចសុីសRX300 មួយគ្រឿងទៀតពណ៌ស ពាក់ស្លាកលេខភ្នំពេញ2AV-6125 ដែលម្ចាស់ឈប់ចតស្ងៀមនៅមុខផ្ទះបណ្តាលឱ្យរងការខូចខាតផ្នែកខាងក្រោយយ៉ាងដំណំ។ ចំណែកបង្គោលភ្លើងថ្មប្រេះបែកបន្តិចបន្តួច រីឯរថយន្តបង្ករងការខូចខាតផ្នែកខាងមុខស្ទើរតែទាំងស្រុង។

ក្រោយកើតហេតុ ម្ចាស់រថយន្តបង្កបានធ្វើការសម្របសម្រួលគ្នាជាមួយភាគីខាងរថយន្តឡិចស៊ីស និងបានហៅរថយន្តស្ទូចមកបម្រុងស្ទូចចេញពីកន្លែងកើតហេតុ តែត្រូវបានប្រជាពលរដ្ឋរាយការណ៍ជូនសមត្ថកិច្ចចុះមកដល់កន្លែងកើតហេតុ ហើយបានពិនិត្យជាក់ស្ដែងឃើញបង្គោលភ្លើងថ្មមានការប្រេះស្រាំទើបសមត្ថកិច្ចមូលដ្ឋានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញរង់ចាំធ្វើការដោះស្រាយគ្នាតាមផ្លូវច្បាប់៕