គ្រោះថ្នាក់ចរារណ៍ រវាងរថយន្តដឹកខ្សាច់ធុនធំមួយគ្រឿង បានកិនម៉ូតូមួយគ្រឿង រងការខូចខាត និងបណ្ដាលឲ្យនារីម្នាក់ រងរបួសធ្ងន់

ភ្នំពេញពេញ ៖ កាលពី យប់ ថ្ងៃទី២១ ខែមីនា ឆ្នាំ២០២២ ស្ថិតនៅចំណុចស្ទុបវត្តចាក់អង្រែក្រោម តាមបណ្ដោយផ្លូវជាតិលេខ២ ក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។
នៅមុនពេលកើតហេតុ គឺមេឃបានភ្លៀងធ្លាក់យ៉ាងខ្លាំង ខណៈពេលនោះក៏មាននារីម្នាក់ជិះម៉ូតូមួយគ្រឿងម៉ាក SUZUKI Nek ពណ៌ស ពាក់ផ្លាកលេខភ្នំពេញ 1HD-1500 បានឆ្លងកាត់ស្ទុប ស្របពេលនោះក៏មានរថយន្តធុនធំម៉ាក DONGFENG ពណ៌ស ពាក់ផ្លាកលេខភ្នំពេញ 3E-5725 បើកបរដោយបុរសម្នាក់ធ្វើដំណើរចេញពីផ្លូវបេតុង ទិសដៅពីលិចមកកើត បំណងឆ្លងស្ទុបបត់ស្ដាំទៅផ្លូវជាតិលេខ២ រួចក៏បុកម៉ូតូ SUZUKI Nek នេះ និងកិនអូសជិត១០ម៉ែត្ររងការខូចខាតយ៉ាងដំណំ ព្រមទាំងបណ្ដាលឲ្យនារីម្នាក់ជាម្ចាស់ម៉ូតូរងរបួសធ្ងន់ធ្ងរផងដែរ ។

ក្រោយកើតហេតុភ្លាមៗ តៃរថយន្តបង្កបានចុះទៅឡើងរថយន្តផ្សេងទៀត រហូតទៅដល់ការដ្ឋានបូមខ្សាច់មួយកន្លែងជាប់ផ្លូវជាតិលេខ២ ក្នុងសង្កាត់ចាក់អង្រែលើ ខណ្ឌមានជ័យ តែត្រូវសមត្ថកិច្ចមូលដ្ឋានចុះឃាត់ខ្លួនយកមកអធិការដ្ឋាននគរបាលខណ្ឌមានជ័យ ដើម្បីដោះស្រាយតាមច្បាប់ ។
ចំណែកនារីរងគ្រោះភ្លាមៗ ក៏ត្រូវបានរថយន្តសាមុយដឹកបញ្ចូនទៅកាន់មន្ទីរពេទ្យ ដើម្បីសង្គ្រោះអាយុជីវិតផងដែរ ។ ដោយឡែករថយន្តនិងម៉ូតូនេះ ត្រូវបានសមត្ថកិច្ចជំនាញ ធ្វើការវាស់វែងយកទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំធ្វើការដោះស្រាយតាមនីតិវិធី ៕