បុរសម្នាក់ បានផឹកស្រាស្រវឹង បើករថយន្តស៊េរីទំនើបម៉ាក NiSSAN PATHFINDER ពាក់ស្លាកលេខ រដ្ឋ22 ,2.3923 បុកហើយ រួចព្យាយាមបើករត់

ភ្នំពេញ ៖ កាលពីវេលាម៉ោង១០និង២០នាទីយប់ថ្ងៃទី២១ ខែមីនា ឆ្នាំ២០២២ នៅតាមបណ្ដោយផ្លូវលេខ២៧១ ក្នុងសង្កាត់បឹងទំពុនទី១ ខណ្ឌមានជ័យ ។ បុរសម្នាក់បានផឹកស្រាស្រវឹង បើករថយន្តស៊េរីទំនើបម៉ាក NiSSAN PATHFINDER ជ្រុលទៅបុកម៉ូតូសណ្ដោងរ៉ឺម៉កដឹកដូងពីក្រោយបណ្ដាលឱ្យរងការខូចខាត រួចព្យាយាម
បើករត់ តែត្រូវប្រជាពលរដ្ឋជួយដេញឃាត់ជាប់ ។

មុនកើតហេតុបុរសរងគ្រោះបានបើកម៉ូតូសណ្ដោងរ៉ឺម៉កដឹកដូងមកឈប់អែបចិញ្ចើមផ្លូវនៅត្រង់ចំណុចកើតហេតុ ខណៈនោះក៏មានបុរសម្នាក់ដែលស្រវឹងស្រាជោកជាំបានបើករថយន្តស៊េរីទំនើបម៉ាក NiSSAN PATHFINDER ពណ៌ស ពាក់ស្លាកលេខ រដ្ឋ22 ,2.3923 ស្របទិសគ្នាមិនប្រុងប្រយ័ត្នក៏ជ្រុលទៅបុករ៉ឺម៉កដឹកដូងពីក្រោយបណ្ដាលឱ្យរងការខូចខាត តែមិនបង្កឱ្យមានមនុស្សរងរបួសឡើយ ។

ភ្លាមៗ រថយន្តបង្កមិនឈប់ទទួលខុសត្រូវនោះទេ គឺព្យាយាមបើករត់ជាច្រើនរយម៉ែត្រ ទើបត្រូវជនរងគ្រោះនិងប្រជាពលរដ្ឋជួយដេញតាមឃាត់បាន ។ សមត្ថកិច្ចមូលដ្ឋានបានចុះមកដល់ និងបានសម្របសម្រួលដល់ភាគីទាំងសងខាង ដើម្បីឲ្យត្រូវគ្នា ហើយចុងក្រោយភាគីបង្កព្រមចេញថ្លៃជួសជុលទៅលើភាគីម៉ូតូសណ្ដោងរ៉ឺម៉ក ដើម្បីបញ្ចប់រឿង ៕