គ្រោះថ្នាក់ចរាចរណ៍ រវាងឡាននិងម៉ូតូ បុកគ្នា បណ្ដាលឱ្យអ្នកបើកម៉ូតូដួលរងរបួស

ភ្នំពេញ៖ កាលពី ថ្ងៃទី ២៦ ខែមីនា ឆ្នាំ២០២២ នៅចំណុចមុខព្រលានយន្តហោះអន្តរជាតិភ្នំពេញ តាមបណ្តោយមហាវិថីសហព័ន្ធរុស្ស៊ី ស្ថិតក្នុងសង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
មុនកើតហេតុគេឃើញបុរសជនជាតិខ្មែរម្នាក់បើករថយន្តស៊េរីទំនើបម៉ាកហ៊ីយ៉ាន់ដាយTUCSONមួយគ្រឿងពណ៌ទឹកប្រាក់ពាក់ស្លាកលេខភ្នំពេញ2AM-3171ដឹកភ្ញៀវជនជាតិកូរ៉េប្រុសស្រីពីរនាក់ចេញពីព្រលានយន្តហោះអន្តរជាតិភ្នំពេញ ក្នុងទិសដៅពីត្បូងទៅជើងឆ្លងមកមហាវិថីសហព័ន្ធរុស្ស៊ីទៅទិសខាងកើត លុះមកដល់ចំណុចកើតហេតុខាងលើក៏មានបុរសម្នាក់ជិះម៉ូតូម៉ាកហុងដាស្គូពីពណ៌ទឹកសមុទ្រលាយសពាក់ស្លាកលេខភ្នំពេញ1HR-4613ក្នុងទិសដៅពីលិចទៅកើតចាប់ហ្វ្រ័ងមិនទាន់ក៏ជ្រុលទៅបុកបញ្ឆិតរថយន្តផ្នែកខាងមុខខាងឆ្វេង បណ្ដាលឱ្យដួលម៉ូតូទៅនឹងថ្នល់រងរបួសជើងស្តាំនិងបាក់ធ្មេញអស់ជាច្រើន។ ចំណែកម៉ូតូរងការខូចខាតយ៉ាងដំណំ។
ក្រោយកើតហេតុភាគីទាំងសងខាងបានធ្វើការសម្របសម្រួលគ្នាអស់រយៈពេលជិត៣ម៉ោងមិនត្រូវគ្នា ទើបរង់ចាំសមត្ថកិច្ចចុះមកធ្វើការវាស់វែងយករថយន្តទៅរក្សាទុករង់ចាំធ្វើការដោះស្រាយគ្នានៅពេលក្រោយ៕