លោកយាយចំណាស់អាយុ៨៥ឆ្នាំម្នាក់ ត្រូវបានម៉ូតូមួយគ្រឿងបើកបុក ស្លាប់យ៉ាងអាណោចអាធ័ម ខណៈដែលគាត់កំពុងដើរនៅតាមដងផ្លូវ

ខេត្តកណ្ដាល៖ កាលពី ថ្ងៃទី២៨ខែមីនា ឆ្នាំ២០២២ លើផ្លូវបេតុង ក្នុងភូមិអន្លង់ព្រីង ឃុំដើមឫស ស្រុកកណ្ដាលស្ទឹង ខេត្តកណ្ដាល។
ជនរងគ្រោះដែលស្លាប់បាត់បង់ជីវិតឈ្មោះ សេម សួន ភេទស្រី អាយុ៨៥ឆ្នាំ មានទីលំនៅបច្ចុប្បន្នភូមិអន្លង់ព្រីង ឃុំដើមឫស ស្រុកកណ្ដាលស្ទឹង ខេត្តកណ្ដាល(ជាអ្នកថ្មើរជើង)។ ចំណែកម៉ូតូបង្កហេតុម៉ាកហុងដា CBR ធុនសេ២៥០ ពណ៌ស+ខ្មៅ ពាក់ស្លាកលេខភ្នំពេញ ១GL-២៤៨១ បើកបរដោយឈ្មោះ យ៉ាន់ សីហា ភេទប្រុស អាយុ២៩ឆ្នាំ មានទីលំនៅភូមិតាតៃ ឃុំញ៉ែងញ៉ង ស្រុកត្រាំកក់ ខេត្តតាកែវ។
នៅវេលាម៉ោងកើតហេតុគេបានឃើញលោកយាយរងគ្រោះជាអ្នកថ្មើរជើងធ្វើដំណើរពីត្បូងទៅជើង លុះមកដល់ចំណុចកើតហេតុ ស្រាប់តែមានម៉ូតូមួយគ្រឿងបើកដោយល្បឿនលឿនក្នុងទិសដៅបញ្ច្រាសគ្នាបានមកបុកលោកយាយរងគ្រោះពេញទំហឹង បណ្ដាលឱ្យលោកយាយរងគ្រោះស្លាប់បាត់បង់ជីវិតយ៉ាងអាណោចអាធ័ម។

ចំណែកសាកសពត្រូវបានប្រគល់ជូនក្រុមគ្រួសារសាច់ញាតិយកទៅធ្វើបុណ្យតាមប្រពៃណី ៕