ក្មេងៗចំនួន៣នាក់ មានក្មេងស្រីជំទង់ ដែលជាអ្នកបើកបរម៉ូតូបានដួលសន្លប់ ក្រោយពីក្របីឈ្មោល មួយក្បាល រត់ទៅជល់បុកពេញទំហឹង

រតនគិរី ៖ កាលពី ថ្ងៃទី១៨ ខែមេសា ឆ្នាំ២០២២នេះ ក្មេងៗចំនួន៣នាក់ ក្នុងនោះមានក្មេងស្រីជំទង់ដែលជាអ្នកបើកបរម៉ូតូបានដួលសន្លប់ ក្រោយពីក្របីឈ្មោលដ៏ធំមួយក្បាល រត់ទៅជល់បុកពេញទំហឹង ពេលកំពុងធ្វើដំណើរកាត់តាមរង្វង់មូល ក្រុងបានលុង ។

ក្របីឈ្មោលមួយក្បាលបានរត់តាមផ្លូវកាត់រង្វង់មូល ហើយបានជល់បុកម៉ូតូក្មេងឌុបគ្នា៣នាក់ បណ្ដាលឲ្យដួលនៅរង្វង់មូលក្រុងបានលុង។ ក្មេងៗចំនួន៣នាក់ក្នុងនោះ មានក្មេងប្រុសម្នាក់ និងក្មេងស្រីជំទង់២នាក់ បានរងរបួស ទទួលរងការភ័យកំពុងសម្រាកព្យាបាលនៅមន្ទីរពេទ្យបង្អែកខេត្តរតនគិរី។
ហេតុការណ៍នេះ ដោយសារតែម្ចាស់ក្របីបាននាំយកក្របីមកពីជនបទពុំធ្លាប់ចងខ្សែមកលក់នៅក្រុងបានលុង។ ក្របីចំនួន២ក្បាលបានដាច់ខ្សែហើយរត់មកតាមផ្លូវ កាត់ហ្វូងមនុស្ស ទើបបង្កជាគ្រោះថ្នាក់បែបនេះ។

សមត្ថកិច្ចដេញចាប់ក្របី ដែលបង្កគ្រោះថ្នាក់ដល់មនុស្សបានចំនួន២ក្បាល និងប្រគល់ទៅឲ្យម្ចាស់វិញ។ ករណីនេះម្ចាស់ក្របី ត្រូវតែទទួលខុសត្រូវដោះស្រាយថវិកាជាមួយក្រុមគ្រួសារជនរងគ្រោះដែលកំពុងសម្រាកព្យាបាលនៅមន្ទីរពេទ្យបង្អែកខេត្ត៕