គ្រោះថ្នាក់ចរាចរណ៍ រវាងឡាននិងម៉ូតូ បណ្តាលឲ្យរងរបួសធ្ងន់ម្នាក់ និងស្រាលម្នាក់

ខេត្តប៉ៃលិន៖ នៅថ្ងៃទី១៧ ខែមេសា ឆ្នាំ២០២២ ស្ថិតក្នុងភូមិអូរពឺត សង្កាត់ទទួលល្វា ក្រុងប៉ៃលិន ខេត្តប៉ៃលិន។ អ្នកបើកបររថយន្ដបុកគេនោះ ឈ្មោះ សារ ឈុនវង្សវឌ្ឍនៈ ភេទប្រុស អាយុ ៣១ឆ្នាំ ជាកូនអ្នកមានម្នាក់ ក្នុងក្រុងប៉ៃលិន រស់នៅភូមិបរឌិននៀវ សង្កាត់ប៉ៃលិន ក្រុងប៉ៃលិន ខេត្តប៉ៃលិន។ បុរសនេះ បើកបររថយន្ត ម៉ាកតូយ៉ូតា រ៉េវ៉ូ (TOYOTA REVO) ពណ៌ស ពាក់ផ្លាកលេខ ប៉ៃលិន 2B 2168។ ចំណែកជនរងគ្រោះទី១. ឈ្មោះ ប៊ុន ផែន ភេទ អាយុ ១៧ឆ្នាំ រស់នៅភូមិអូរតាវ៉ៅ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។ ជនរងគ្រោះទី២. ឈ្មោ សឹម ថានិត ភេទប្រុស អាយុ ១៥ឆ្នាំ រស់នៅភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន។

មុនពេលកើតហេតុ គេឃើញបុរសខាងលើ បានបើកបររថយន្តដឹកមិត្តភក្តិ ក្នុងទិសដៅពីកើតទៅលិច ចំកណ្តាលក្រុងប៉ៃលិន ក្នុងល្បឿនយ៉ាងលឿន ហើយក៏វ៉ាជែងរថយន្តដទៃទៀត ដែលកំពុងបើកបរស្របទិសគ្នា បណ្តាលឱ្យជ្រុលចង្កូត ទៅបុកនឹងម៉ូតូជនរងគ្រោះទាំងពីរគ្រឿងយ៉ាងពេញទំហឹង បណ្តាលឱ្យដួលប្រាវតែម្តង ស្របពេល ដែលម៉ូតូ និងរថយន្តប្រជាពលរដ្ឋ កំពុងបើកបរយ៉ាងមមាញឹកនៅតាមដងផ្លូវ។
ក្រោយធ្វើការវាស់វែង កម្លាំងនគរបាលជំនាញ បានយកវត្ថុតាងទៅរក្សាទុកនៅការិយាល័យនគរបាលចរាចរណ៍ផ្លូវគោក រង់ចាំធ្វើការដោះស្រាយ ៕