ជនសង្ស័យម្នាក់ ក្នុងចំណោមបក្ខពួក២នាក់ សមត្ថកិច្ចឃាត់ខ្លួន ពាក់ព័ន្ធនឹងករណីលួចម៉ូតូ

ភ្នំពេញ៖ កាលពី ថ្ងៃទី១៩ ខែមេសា ឆ្នាំ២០២២ នៅចំណុចផ្លូវលំជិតកន្លែងលក់ទឹកត្នោតជូរ ក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យឈ្មោះជា បញ្ញា ភេទប្រុសអាយុ២០ឆ្នាំ មុខរបរនិងស្នាក់នៅមិនពិតប្រាកដ ។ ចំណែកជនសង្ស័យដែលគេចខ្លួនឈ្មោះអេ ភេទប្រុស អាយុប្រហែល៣៥ឆ្នាំ ។
មុនពេលកើតហេតុកម្លាំងប្រជាការពារភូមិទួលពង្រ បានល្បាតក្នុងមូលដ្ឋានងាយរងគ្រោះ ខណៈមកដល់ចំណុចកើតហេតុស្រាប់តែឃើញជនសង្ស័យ២នាក់ឈប់ម៉ូតូហើយឈរលើផ្លូវ។ដោយមានការសង្ស័យសមត្ថកិច្ចក៏សួរនាំ ភ្លាមៗនោះឈ្មោះអេ ក៏បានជិះម៉ូតូគេចខ្លួនបាត់ទៅបន្សល់ទុកបក្ខពួកម្នាក់នៅនឹងកន្លែងកើតហេតុ ទើបកម្លាំងប្រជាការពារសុំធ្វើការឆែកឆេរលើដងខ្លួនរកឃើញដែកសម្រាប់កាច់សោ.កម៉ូតូចំនួន២ដើមនៅជាប់ចង្កេះ ទើបឃាត់ខ្លួននាំយកទៅប៉ុស្តិ៍នគរបាលតែម្តង។
ជនសង្ស័យបានសារភាពថា ខ្លួនពិតជាធ្លាប់លួចកាច់សោ.កម៉ូតូប្រជាពលរដ្ឋពិតប្រាកដមែន។
ជនសង្ស័យត្រូវបានសមត្ថកិច្ចកសាងសំណុំរឿងបញ្ជនទៅផ្នែកព្រហ្មទណ្ឌ ដើម្បីចាត់ការតាមច្បាប់៕