អតីតតារាសម្តែងនាទសវត្សរ៍ឆ្នាំ៨០-៩០ លោក សុវណ្ណ មុន្នី បានរំលេចរូបថតនៃការសម្តែងរបស់លោកកាលពីអតីតកាល ជាមួយនឹងអារម្មណ៍នឹករលឹក

អតីតតារាសម្តែងនាទសវត្សរ៍ឆ្នាំ៨០-៩០ លោក សុវណ្ណ មុន្នី បានរំលេចរូបថតនៃការសម្តែងរបស់លោកកាលពីអតីតកាល ជាមួយនឹងអារម្មណ៍នឹករលឹក

ភ្នំពេញ ៖ រូបភាពជាច្រើនសន្លឹកដែលអតីតតារាសម្តែងរូបនេះ បានបង្ហោះតាមបណ្តាញសង្គមដោយនៅក្នុងនោះការសម្តែងរបស់លោកជាមួយនឹងអ្នកនាង អម្ពរ ទេវី, ពិសិដ្ឋ ពិលីកា, សុខ ស្រីមុំ, កែវ កល្យាណ និងតារាប្រុសស្រីមួយចំនួនទៀត។
អតីតតារាសម្តែងនាទសវត្សរ៍ឆ្នាំ៨០-៩០ លោក សុវណ្ណ មុន្នី បានរំលេចរូបថតនៃការសម្តែងរបស់លោកកាលពីអតីតកាល ជាមួយនឹងអារម្មណ៍នឹករលឹកទៅដល់មិត្តភក្តិដែលធ្លាប់សម្តែងរួមជំនាន់ជាមួយគ្នា ។

តាមរយៈរូបថតនៃការសម្តែងចាស់ៗជាច្រើនសន្លឹកលោក សុវណ្ណមុន្នី បានបង្ហោះចែករំលែកនៅលើគណនីហ្វេសប៊ុកជាមួយនឹងពាក្យពេចន៍ថា «នឹករលឹកអនុស្សាវរីយ៍ជាច្រើន នៅគ្រប់ទីកន្លែង កាលនៅយុវវ័យជាមួយមិត្តភក្តរួមជំនាន់»។ ការផុសរូបភាពចាស់ៗទាំងអស់នេះឡើងវិញ គឺដោយសារលោកមានការនឹករលឹកយ៉ាងខ្លាំងទៅដល់មិត្តភក្តិទាំងអស់របស់លោក ។ លោកសង្ឃឹមថា លោកនិងមិត្តទាំងអស់នេះនឹងបានជួបគ្នានៅថ្ងៃណាមួយ លោកពិតជាស្រឡាញ់អ្នកទាំងអស់គ្នាខ្លាំងណាស់ ។
តាមរយៈរូបភាពដែលលោក សុវណ្ណ មុន្នី បានបង្ហោះនេះ គេឃើញមានការចូលទៅខំមិនពីតារាជើងចាស់រួមជំនាន់មានលោកទេព រិនដារ៉ូ និងលោក យុត្ថារ៉ា ឆានី ជាដើម បានសម្តែងការនឹករលឹកចំពោះលោកដូចគ្នាផងដែរ ។

ជាការកត់សម្គាល់លោក សុវណ្ណ មុន្នី គឺជាតារាសម្តែងមួយរូបធ្លាប់មានកេរ្តិ៍ឈ្មោះមួយរូបផង បើប្រៀបធៀបទៅនឹងតារាសម្តែងដែលល្បីៗកាលពីទសវត្សរ៍ឆ្នាំ៩០។
អតីតតារាសម្តែង សុវណ្ណ មុន្នី បានចូលប្រឡូកក្នុងវិស័យឧស្សាហកម្មសម្តែងភាពយន្តតាំងពីឆ្នាំ១៩៨៨ ខណៈពេលខ្សែភាពយន្តដែលលោកបានសម្តែងមានរហូតដល់ទៅ៤០រឿង ក្នុងនោះរឿងដែលមានការគាំទ្រច្រើនមានដូចជា រឿង «ព្យុះជីវិត» រឿង «ចៅគីង្គក់» រឿង «បិសាចតណ្ហា» រឿង «ចាបស្រុកនៅឯព្រៃ» រឿង «ស្នេហ៍ពីរជាតិ» និង រឿងជាច្រើនទៀត ហើយលោកក៏បានសម្តែងចម្រៀងកាយវិការជាច្រើនបទផងដែរ ។
លោក សុវណ្ណ មុន្នី បានសម្រេចចិត្តឈប់ពីអាជីពសម្តែងនេះនៅក្នុងអំឡុងឆ្នាំ១៩៩៧ ហើយបានចេញទៅសាងជីវិតថ្មី នឹងមានគ្រួសារនៅលើទឹកដីអាមេរិករហូតមកទល់បច្ចុប្បន្ន ៕