Ipswich ចុះកិច្ចសន្យាជាមួយខ្សែប្រយុទ្ធ Liam Delap មកពី Man City

(ឡុងដ៍)៖ Ipswich Town បានចុះកិច្ចសន្យារយៈពេល ៥ឆ្នាំ ជាមួយខ្សែប្រយុទ្ធ Liam Delap មកពីក្លិប Manchester City។ នេះបើតាមការបញ្ជាក់ពីក្លិបទើបឡើងថ្មីលេងនៅលីគ Premier League ហើយត្រូវបានចុះផ្សាយដោយសារព័ត៌មាន CNA នៅថ្ងៃទី១៤ ខែកក្កដា ឆ្នាំ២០២៤។
កីឡាករវ័យ ២១ឆ្នាំរូបនេះ បានចំណាយពេលវេលាកាលពីរដូវកាលមុន លេងខ្ចីជើងនៅក្លិប Hull City ដែលលេងនៅលីគ English Championship ដោយរកបាន ៨គ្រាប់ ក្នុងការបង្ហាញខ្លួន ៣២លើក។
ទាំង Ipswich និងក្លិប City មិនបានបង្ហាញពីព័ត៌មានលម្អិតហិរញ្ញវត្ថុ ស្តីពីការចុះកិច្ចសន្យានេះនោះទេ ប៉ុន្តែប្រព័ន្ធផ្សព្វផ្សាយអង់គ្លេស ឮបានរាយការណ៍ថា កិច្ចសន្យានេះ មានតម្លៃប្រមាណ ១៥លានផោន (១៩.៤៩លានដុល្លារ) បូកនឹងប្រាក់បន្ថែម។
សូមជម្រាបថា Delap បានលេងអោយក្រុមជម្រើសជាតិអង់គ្លេស នៅកម្រិតជាច្រើន ហើយបានក្លាយជាកីឡាករទី៤ ហើយ ដែលបានចុះកិច្ចសន្យាជាមួយក្លិប Ipswich ក្នុងរដូវកាលដោះដូរកីឡាករនេះ។ លោកក៏ធ្លាប់លេងខ្ចីជើងនៅក្លិប Stoke និងក្លិប Preston North End ផងដែរ៕