គ្រោះថ្នាក់ចរាចរណ៍គួរឱ្យរន្ធត់ រវាងរថយន្តនិងម៉ូតូ ធ្វើដំណើរបញ្ច្រាសទិសគ្នា បុកពេញទំហឹងបណ្ដាលឱ្យរបួស២នាក់

ខេត្តស្វាយរៀង៖ ហេតុការណ៍នេះបានកើតឡើងនៅ យប់ថ្ងៃទី២០ខែតុលាឆ្នាំ២០២៤លើផ្លូវជាតិលេខ១ស្ថិតក្នុងភូមិលាប ឃុំកណ្ដៀងរាយ ស្រុកស្វាយទាប ខេត្តស្វាយរៀង។
ករណីគ្រោះថ្នាក់ចរាចរណ៍គួរឱ្យរន្ធត់ រវាងរថយន្តស៊េរីទំនើបនិងម៉ូតូម៉ាក scoopy ធ្វើដំណើរបញ្ច្រាសទិសគ្នាបុកពេញទំហឹងបណ្ដាលឱ្យរបួស២នាក់ ខណៈមេឃកំពុងភ្លៀងខ្លាំង បង្កការភ្ញាក់ផ្អើលដល់អ្នកភូមិនិងអ្នកធ្វើដំណើរទាំងយប់នៅស្រុកស្វាយទាប។

មុនកើតហេតុ មានម៉ូតូមួយគ្រឿងម៉ាកហុងដាស្គូពីពណ៌ស ពាក់ស្លាកលេខភ្នំពេញ១KS.២៦៧៧ ជិះគ្នា២នាក់មិនត្រូវបានស្គាល់ឈ្មោះ ដោយធ្វើដំណើរលើផ្លូវជាតិលេខ១ ក្នុងទិសដៅពីលិចមកកើតដោយប្រើប្រាស់ល្បឿនលឿនហើយសង្ស័យស្រវឹងស្រា ក៏បុកជាមួយរថយន្តស៊េរីទំនើបមួយគ្រឿងពណ៌ស ពាក់ស្លាកលេខ ភ្នំពេញ២BM.៥៤៤២ បើកបរដោយបុរសម្នាក់ មិនត្រូវបានស្គាល់ឈ្មោះ ដែលបើកបញ្ច្រាសទិសគ្នាយ៉ាងពេញទំហឹងបណ្ដាលឱ្យរងរបួស២នាក់បង្កការភ្ញាក់ផ្អើលតែម្ដង។
ក្រោយមក អ្នករងរបួសទាំង២នាក់ត្រូវបានក្រុមគ្រួសារសាច់ញាតិ ដឹកទៅសង្គ្រោះនៅមន្ទីរពេទ្យបង្អែកស្រុកស្វាយទាបខណៈរថយន្តនិងម៉ូតូសមត្ថកិច្ចវាស់វែងនិងអូសយកមកកាន់អធិការដ្ឋាននគរបាលស្រុកស្វាយទាប និងអ្នកបើករថយន្តមកសាកសួរ ដើម្បីដោះស្រាយតាមច្បាប់ ៕