អគ្គស្នងការដ្ឋាននគរបាលជាតិ អំពាវនាវម្ចាស់ទីតាំង ឬអគារ សហការជាមួយកម្លាំងសមត្ថកិច្ចពន្លត់អគ្គិភ័យ សំដៅរក្សាសន្ដិសុខ និងសណ្ដាប់ធ្នាប់, ការរារាំងដល់ប្រតិបត្តិការជាអំពើខុសច្បាប់

(ភ្នំពេញ)៖ នៅថ្ងៃទី២៨ ខែតុលា ឆ្នាំ២០២៤នេះ អគ្គស្នងការដ្ឋាននគរបាលជាតិ តាមរយៈនាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះ បានធ្វើការអំពាវនាវដល់ម្ចាស់ទីតាំង ឬម្ចាស់អគារទាំងអស់នៅទូទាំងប្រទេស ចូលរួមសហការជាមួយកម្លាំងសមត្ថកិច្ចពន្លត់អគ្គិភ័យ នៅពេលមានហេតុការណ៍កើតឡើង ដើម្បីរួមចំណែកដល់ការធានាសន្ដិសុខ សណ្ដាប់ធ្នាប់នៅក្នុងសង្គម។

លោកឧត្តមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះ បានអះអាងថា ការរារាំង ឬមិនបង្កលក្ខណៈឲ្យកម្លាំងសមត្ថកិច្ចជំនាញបំពេញប្រតិបត្តិការ ដែលនាំឲ្យមានហេតុការណ៍ធ្ងន់ធ្ងរកើតឡើង គឺជាអំពើខុសច្បាប់ រហូតត្រូវកំណត់ដាក់ពន្ធនាគារថែមទៀតផង ដោយផ្អែកទៅតាមមាត្រា២៨ នៃច្បាប់ស្ដីពីការបង្ការ និងការពន្លត់អគ្គិភ័យ ឆ្នាំ២០១៣។

ដោយទទួលបាននូវការណែនាំពីនាយឧត្តមសេនីយ៍ ស ថេត អគ្គស្នងការនគរបាលជាតិ, លោកឧត្តមសេនីយ៍ឯក នេត វន្ថា បានធ្វើការអំពាវនាវដល់ម្ចាស់ទីតាំង ឬម្ចាស់អគារទាំងអស់នៅទូទាំងប្រទេស ត្រូវផ្ដល់កិច្ចសហការឲ្យបានល្អដល់កម្លាំងសមត្ថកិច្ចជំនាញពន្លត់អគ្គិភ័យ នៅពេលមានហេតុការណ៍ណាមួយកើតឡើង ដើម្បីសមត្ថកិច្ចមានលទ្ធភាពគ្រប់គ្រាន់ក្នុងការចេញប្រតិបត្តិការសង្គ្រោះ សំដៅធានាដល់សន្ដិសុខ និងសណ្ដាប់ធ្នាប់នៅក្នុងសង្គម។

សូមជម្រាបថា យោងតាមច្បាប់ស្ដីពីការបង្ការ និងការពន្លត់អគ្គិភ័យ មាត្រា២៨ បានចែងថា «អំពើរារាំងបង្កឧបសគ្គដោយចេតនាដល់សកម្មភាពពន្លត់អគ្គិភ័យ បង្កឲ្យមានការខូចខាតធ្ងន់ធ្ងរដល់ទ្រព្យសម្បត្តិ ត្រូវផ្ដន្ទាទោសដាក់ពន្ធនាគារពី ២ឆ្នាំ ដល់៥ឆ្នាំ និងពិន័យជាប្រាក់ពី៤លានរៀល ដល់១០លានរៀល»៕