គ្រោះថ្នាក់ចរាចរណ៍ រវាងរថយន្ដមួយគ្រឿង បេីកបុកម៉ូតូ បណ្ដាលឱ្យបាក់ជើងឆ្វេងម្ខាង

ភ្នំពេញ៖ កាលពី យប់ ថ្ងៃទី៣០ ខែតុលា ឆ្នាំ២០២៤ មានករណីគ្រោះថ្នាក់ចរាចរណ៍មួយរវាងរថយន្តស៊េរីទំនេីបនិងម៉ូតូមួយគ្រឿងបណ្តាលឲ្យភាគីខាងម៉ូតូរងរបួសធ្ងន់ ដោយបាក់កជើងខាងឆ្វេងម្ខាង ត្រូវបានរថយន្តសាមុយដឹកបញ្ជូនទៅសង្គ្រោះបន្ទាន់ ទីតាំងកើតហេតុ ស្ថិតនៅតាមបណ្តោយផ្លូវហាណូយ កែងផ្លូវ២៨គ្រួសារ ស្ថិតក្នុងសង្កាត់គោកឃ្លាង ខណ្ឌសែនសុខ។

មុនពេលកើតហេតុ គេបានឃើញបុរសរងគ្រោះជិះម៉ូតូ SUZUKI SMASH V ពណ៌ក្រហម ពាក់ផ្លាកលេខ ភ្នំពេញ 1CQ-6109 ធ្វើដំណើរចេញពីផ្លូវ២៨គ្រួសារ គោលបំណងបត់ឡើងទៅផ្លូវហាណូយ ។ ស្របពេលនោះក៏ស្រាប់តែមានរថយន្តស៊េរីទំនេីបមួយគ្រឿង ម៉ាកGAC ពណ៌ស ពាក់ផ្លាកលេខភ្នំពេញ 2CB-0110 ធ្វើដំណើរតាមបណ្តោយផ្លូវហាណូយ ទិសដៅពីជើងទៅត្បូង លុះមកដល់ចំណុចកើតហេតុ រថយន្តក៏បានបុកម៉ូតូពេញទំហឹង បណ្តាលឲ្យបុរសម្ចាស់ម៉ូតូដួលរងរបួសបាក់កជើងខាងឆ្វេង ។ ភ្លាមៗនោះប្រជាពលរដ្ឋបាននាំគ្នាទាក់ទងទៅកាន់សមត្ថកិច្ច ព្រមទាំងបានហៅរថយន្តសាមុយ ដើម្បីមកទទួលបុរសរងគ្រោះយកទៅព្យាបាលរបួសផងដែរ ។

សមត្ថកិច្ចជំនាញចរាចរណ៍ដើម្បីចុះមកធ្វើការវាស់វែងនិងយករថយន្តបង្កនិងម៉ូតូទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំភាគីទាំងសងខាងចូលខ្លួនទៅដោះស្រាយតាមនីតិវិធីច្បាប់ ៕