ករណីសិស្សសាលា ២ នាក់ស្លា//ប់ បន្ទាប់ពីជិះម៉ូតូម៉ូបុករថយន្ត នៅស្រុកសណ្តាន់

ខេត្តកំពង់ធំ៖ ករណីគ្រោះថ្នាក់ចរាចរណ៍បានបណ្តាលឲ្យសិស្សសាលា ២ នាក់ស្លាប់ភ្លាមៗនៅកន្លែងកើតហេតុ បន្ទាប់ពីម៉ូតូនៃម៉ាក ហុងដា ឌ្រីម ពណ៌ខ្មៅ សេរីឆ្នាំ ២០១០ ពាក់ផ្លាកលេខ កំពត1D-5783 ដែលមានសិស្ស ២ នាក់ជិះ ប៉ះទង្គិចជាមួយរថយន្តម៉ាក ហ្វដ ពណ៌ស ផ្លាកលេខ ភ្នំពេញ2AC-0279។
ហេតុការណ៍នេះកើតឡើងនៅ ថ្ងៃទី ១១ ខែវិច្ឆិកា ឆ្នាំ ២០២៤ ត្រង់ចំណុចផ្លូវប្រសព្វភូមិរកាជួរ ស្ថិតនៅឃុំក្លែង ស្រុកសណ្តាន់ ខេត្តកំពង់ធំ។
តាមប្រភពពីសមត្ថកិច្ច អ្នកបើកបររថយន្តមានឈ្មោះ ស៊ឹម លាម ភេទប្រុស អាយុ ៥៤ ឆ្នាំ មុខរបរ អាជីវករ ទីលំនៅភូមិអូរតាសៀវ ឃុំគោល ស្រុកប្រាសាទសំបូរ។ បន្ទាប់ពីកើតហេតុ លោកបានចុះរត់គេចខ្លួនបាត់។
សម្រាប់យុវសិស្សទាំង ២ ដែលជាជនរងគ្រោះបានស្លាប់ភ្លាមៗនៅកន្លែងកើតហេតុ គឺ៖ ១. អ៊ឹម ពិសី ភេទស្រី អាយុ ១៦ ឆ្នាំ មុខរបរ សិស្ស។ ២. ម៉ប ម៉ាណិត ភេទស្រី អាយុ ១៦ ឆ្នាំ មុខរបរ សិស្ស។
ជនរងគ្រោះទាំងអស់រស់នៅភូមិទឹកវិល ឃុំក្លែង ស្រុកសណ្តាន់ ខេត្តកំពង់ធំ។ ក្រុមគ្រួសារបច្ចុប្បន្នបានយកសាកសពទៅធ្វើបុណ្យតាមប្រពៃណីនៅគេហដ្ឋានរបស់ជនរងគ្រោះ ខណៈរថយន្ត និងម៉ូតូត្រូវបានកម្លាំងអធិការដ្ឋាននគរបាលស្រុកសណ្តាន់យកទៅរក្សាទុកដើម្បីដោះស្រាយបន្ត ៕