យុវជនម្នាក់ជិះម៉ូតូឌុបនារីម្នាក់ក្នុងល្បឿនលឿនគេចពីរថយន្តជ្រុលទៅបុកបង្គោលភ្លើង បោកក្បាលស្លា//ប់ទាំង២នាក់ភ្លាមៗ

ភ្នំពេញ ៖ គ្រោះថ្នាក់ចរាចរណ៍ដ៏រន្ធត់នេះបានបង្កការភ្ញាក់ផ្អើលកាលពី យប់ថ្ងៃទី ២៣ ខែវិច្ឆិកា ឆ្នាំ២០២៤ នៅតាមបណ្តោយផ្លូវបេតុង ក្នុងសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។
ប្រភពព័ត៌មានបានបញ្ជាក់ថា យុវជនម្នាក់ជិះម៉ូតូឌុបនារីម្នាក់ក្នុងល្បឿនលឿនគេចពីរថយន្តជ្រុលទៅបុកបង្គោលភ្លើង បោកក្បាលស្លាប់ទាំង២នាក់ភ្លាមៗ។

មុនពេលកើតហេតុ គេឃើញយុវជនប្រុសស្រី០២នាក់ជិះម៉ូតូមួយគ្រឿង ម៉ាក ហុងដាឌ្រីម ពណ៌ខ្មៅ ពាក់ស្លាកលេខ កំពង់ចាម 1AC-0935 បើកបរក្នុងទិសដៅពីជើងទៅត្បូង ខណៈមកដល់ចំណុចកើតហេតុបានជិះម៉ូតូគេចពីរថយន្តក៏ជ្រុលទៅបុកធុងសំរាមនឹងបានបន្តទៅបុកបង្គោលភ្លើងពេញមួយទំហឹង បណ្តាលឱ្យបោកក្បាលស្លាប់ទាំង០២នាក់ភ្លាមៗនៅនឹងកន្លែងកើតហេតុតែម្តង ។

សមត្ថកិច្ចមូលដ្ឋានបានចុះមកដល់កន្លែងកើតហេតុ រួចធ្វើការទាក់ទងទៅមន្រ្តីចរាចរណ៍ នៃការិយាល័យចរាចរណ៍ផ្លូវគោកដើម្បីមកវាស់វែងយកម៉ូតូទៅរក្សាទុករង់ចាំដោះស្រាយពេលក្រោយ ។ ចំណែកសពត្រូវបានសមត្ថកិច្ចធ្វើកំណត់ហេតុយកទៅតម្កល់នៅវត្តតាំងក្រសាំង រង់ចាំសាច់ញាតិមកទទួលយកទៅធ្វើបុណ្យតាមប្រពៃណី ៕