បុរសម្នាក់បានបាត់បង់ជីវិតភ្លាមៗ និងម្នាក់ទៀតរងរបួសធ្ងន់ ក្រោយបើកម៉ូតូវ៉ាជែង ខ្វះការប្រុងប្រយ័ត្នបានជ្រុលទៅបុកជាមួយគោយន្តកន្រ្តៃ

ខេត្តបាត់ដំបង៖ នៅ យប់ ថ្ងៃទី២៤ ខែវិច្ឆិកា ឆ្នាំ២០២៤ យ៉ាងហោចណាស់បុរសម្នាក់បានបាត់បង់ជីវិតភ្លាមៗនិងម្នាក់ទៀតរងរបួសធ្ងន់ ក្រោយបើកម៉ូតូវ៉ាជែង ខ្វះការប្រុងប្រយ័ត្នបានជ្រុលទៅបុកជាមួយគោយន្តកន្រ្តៃ លើកំណាត់ផ្លូវក្រាលគ្រួស ក្រហមពីអក្សរតេ មកឃុំចែងមានជ័យ ត្រង់ចំណុចពីខាងត្បូងស្ពានមេម៉ាយ ស្ថិតក្នុងក្រុមទី៦ ភូមិបុសខ្នុរ ឃុំចែងមានជ័យ ស្រុកបាណន់ ខេត្តបាត់ដំបង ។
ករណីគ្រោះថ្នាក់ចរាចរណ៍ខាងលើនេះបានកើត ឡើងរវាងម៉ូតូម៉ាកហុងដាឌ្រីម ពណ៌ខ្មៅ សេរីឆ្នាំ២០១៩ មួយគ្រឿង ពាក់ស្លាកលេខ បាត់ដំបង1AH -4316 បើកបរដោយឈ្មោះ វ៉ាត់ ជីវី ភេទប្រុស អាយុ២៤ឆ្នាំ រស់ នៅភូមិសំបួរមាស ឃុំស្នឹង ស្រុកបាណន់ ខេត្តបាត់ដំបង (ស្លាប់នៅនឹងកន្លែងកើតហេតុ)និងអ្នករួមដំណើរ១នាក់ ឈ្មោះ ធុយ សុធាន ភេទប្រុស អាយុ២៦ឆ្នាំ រស់នៅភូមិធ្ងរ ឃុំចែងមានជ័យ ស្រុកបាណន់ (រងរបួសធ្ងន់) បើក បរទិសដៅពីត្បូងទៅជើង លុះមកដល់ចំណុចកើតហេតុបានឡើងវ៉ាជែងក៏ជ្រុលទៅបុកគោយន្តកន្ត្រៃសណ្តោងរ៉ឺម៉ក បើកបរដោយបុរសម្នាក់មិនស្គាល់អត្តសញ្ញាណ បានរត់គេចខ្លួនបាត់ ទិសដៅពីជើងទៅត្បូង ។
ជនរងគ្រោះត្រូវបានបញ្ជូនទៅមន្ទីរពេទ្យខេត្តបាត់ដំបង ចំណែកសាកសពប្រគល់ឱ្យសាច់ញាតិយករៀបចំធ្វើបុណ្យតាមប្រពៃណី ដោយ ឡែកមធ្យោបាយទាំងពីរយកទៅរក្សាទុកនៅការិយា ល័យចរាចរណ៍ខេត្តដើម្បីចាត់ការតាមនីតិវិធីច្បាប់ ៕