លោក តាំង សុផាត អគ្គនាយករង អញ្ជើញចុះត្រួតពិនិត្យគម្រោងស្តារប្រឡាយមេ៨៥ ក្នុងភូមិសាស្ត្រខេត្តតាកែវ

ខេត្តតាកែវ៖ លោក តាំង សុផាត អគ្គនាយករង នៃអគ្គនាយកដ្ឋានកិច្ចការបច្ចេកទេស និងជាអនុប្រធានអង្គភាពត្រួតពិនិត្យគម្រោង ក្នុងនាមតំណាងឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានដឹកនាំក្រុមការងាររបស់អង្គភាព សហការជាមួយមន្ត្រីបច្ចេកទេសនាយកដ្ឋានវិស្វកម្ម និងលោកអនុប្រធានមន្ទីរធនធានទឹក និងឧតុនិយមខេត្តតាកែវ ចុះពិនិត្យគម្រោងស្តារប្រឡាយមេ៨៥ ដែលមានទីតាំងស្ថិតក្នុងឃុំក្រពុំឈូក ស្រុកកោះអណ្តែត ខេត្តតាកែវ ។
សូមជម្រាបថា គម្រោងស្តារប្រឡាយមេ៨៥ គឺដើម្បីស្តារប្រឡាយឱ្យបានជ្រៅ លើកកម្ពស់ភ្លឺខ្នងប្រឡាយមេឱ្យខ្ពស់សម្រាប់ បង្កើនបរិមាណស្តុកទឹកក្នុងប្រឡាយដែលទទួលពីផ្ទៃរងទឹកភ្លៀងក្នុងតំបន់ និងពីស្ទឹងដែលហូរចូលនារដូវវស្សា សម្រាប់ការងារស្រោចស្រពស្រូវប្រាំង ដំណាំកសិកម្ម និងការប្រើប្រាស់ប្រចាំថ្ងៃ ព្រមទាំងធ្វើជាផ្លូវលំសម្រាប់ធ្វើដំណើរក្នុងមូលដ្ឋាន និងជាតំបន់រក្សា និងការពារធនធានធម្មជាតិក្នុងមូលដ្ឋាន ជូនប្រជាពលរដ្ឋចំនួន ៥៦១គ្រួសារ ក្នុងភូមិចំនួន៥ នៃឃុំក្រពុំឈូក ស្រុកកោះអណ្តែត ខេត្តតាកែវ។
លោកអគ្គនាយករងបានបញ្ជាក់ឱ្យដឹងថា ការងារសំខាន់ៗរបស់គម្រោងស្តារប្រឡាយមេ៨៥ រួមមាន៖ ១) ធ្វើការស្តារប្រឡាយមេប្រវែង ៤ ៧០០ម៉ែត្រ និង ២)សាងសង់សំណង់ស្ពានឆ្លងប្រឡាយចំនួន ៤កន្លែង បើគិតមកដល់ពេលនេះវឌ្ឍនភាពការងារសម្រេចបាន១០០%។
ទន្ទឹមនឹងនេះ លោកអគ្គនាយករងបានបញ្ជាក់បន្ថែមថា នៅពេលគម្រោងបញ្ចប់ ប្រព័ន្ធប្រឡាយមេនេះមានតួនាទីទទួលប្រភពទឹកពីផ្ទៃរងទឹកភ្លៀងក្នុងតំបន់ និងទឹកពីស្ទឹងតាកែវសម្រាប់ស្រោចស្រពលើផ្ទៃដីបង្កបង្កើនផលកសិកម្ម ស្រូវវស្សាចំនួន ៨០ហិកតា ស្រូវប្រាំងលើកទី១ចំនួន ៤២០ហិកតា ស្រូវប្រាំងលើកទី២ចំនួន ៤២០ហិកតា និងដំណាំរួមផ្សំចំនួន ១០ហិកតា។
អគ្គនាយករងនៃអគ្គនាយកដ្ឋានកិច្ចការបច្ចេកទេសក្រសួងធនធានទឹក និងឧតុនិយម លោក តាំង សុផាត បានផ្តាំផ្ញើដល់ក្រុមការងារអនុវត្តគម្រោងរបស់នាយកដ្ឋានវិស្វកម្ម និងសហគមន៍កសិករប្រើប្រាស់ទឹកត្រូវយកចិត្តទុកដាក់លើការងារគ្រប់គ្រង និងប្រើប្រាស់សមិទ្ធផលថ្មីនេះឱ្យបានត្រឹមត្រូវតាមលក្ខណៈបច្ចេកទេស និងបានណែនាំដល់មន្ទីរធនធានទឹក និងឧតុនិយមធ្វើការគ្រប់គ្រងសមិទ្ធផលទាំងនេះឱ្យមានសុវត្ថិភាព និងប្រើប្រាស់បានត្រឹមត្រូវ ជាពិសេសជំរុញសហគមន៍កសិករប្រើប្រាស់ទឹក និងអាជ្ញាធរដែនដី ចុះផ្សព្វផ្សាយការប្រើប្រាស់ប្រព័ន្ធធារាសាស្ត្រនេះឱ្យមាននិរន្តរភាព សម្រាប់ការងារស្រោចស្រព និងការប្រើប្រាស់ប្រចាំថ្ងៃជូនប្រជាពលរដ្ឋបានយូរអង្វែង៕