គោព្រៃកម្ពុជា បន្ថែមកីឡាករចូលសញ្ជាតិ ៣រូប ត្រៀមប្រយុទ្ធពាន AFF Cup 2024 ចុងសប្ដាហ៍នេះ

(ភ្នំពេញ)៖ ក្រុមជម្រើសជាតិកម្ពុជា បានបង្ហាញបញ្ជីឈ្មោះកីឡាករ ២៦នាក់ ដែលត្រូវបានប្រមូលផ្ដុំហ្វឹកហាត់ត្រៀមការប្រកួតជើងឯកបាល់ទាត់អាស៊ីអាគ្នេយ៍ AFF Mitsubishi Electric Cup ឆ្នាំ២០២៤ ចាប់ពីថ្ងៃទី០៨ ខែធ្នូ ឆ្នាំ២០២៤ ដល់ថ្ងៃទី០៥ ខែមករា ឆ្នាំ២០២៥ ខាងមុខ ដោយកម្ពុជា ស្ថិតក្នុងពូលA ជាមួយថៃ ម៉ាឡេស៊ី សិង្ហបុរី និងទីម័រខាងកើត។
សម្រាប់ការប្រមូលផ្ដុំលើកនេះ កាន់តែភ្ញាក់ផ្អើល និងគួរឲ្យចាប់អារម្មណ៍ សម្រាប់អ្នកគាំទ្រក្រុមគោព្រៃ ថែមទៀត បន្ទាប់ពីកម្ពុជា បានបន្ថែមនូវកីឡាករបរទេស ៣រូប បានទទួលសញ្ជាតិខ្មែរ ដើម្បីចូលរួមជាមួយក្រុមជម្រើសជាតិកម្ពុជា ក្រោយពួកគេក្របលក្ខខណ្ឌប្រកបអាជីពនៅកម្ពុជា ហើយក៏ជាអ្វីដែលអ្នកគាំទ្រមួយចំនួនចង់ឃើញដែរ រួមមានខ្សែការពារ Ose Takaki (ជប៉ុន) និងខ្សែប្រយុទ្ធ Andres Neito (កូឡុំប៊ី) របស់ក្លិបភ្នំពេញក្រោន និងខ្សែប្រយុទ្ធ Abdel Kader Coulibaly (កូឌឺវ័រ) ប្រធានក្រុម ISI ដង្កោសែនជ័យ។
សរុបកីឡាករចូលសញ្ជាតិ និងត្រូវបានកោះហៅចូលរួមជួយក្រុមគោព្រៃកម្ពុជាលើកនេះ គឺមានចំនួន ៦នាក់ ខណៈ ៣នាក់ទៀត គឺមានខ្សែការពារជាតិ កាន់ ម៉ូ (សញ្ជាតិដើមអាហ្វ្រិកខាងត្បូង) មកពីវិសាខា, យូឌៃ អូកាវ៉ា (សញ្ជាតិដើមជប៉ុន) មកពីភ្នំពេញក្រោន និង មីហ្ស៊ូណូ ហ៊ីការ៉ុ (សញ្ជាតិដើមជប៉ុន) មកពីព្រះខ័នរាជស្វាយរៀង។
ក្រៅពីកីឡាករចូលជាតិខាងលើ មានកីឡាករឆ្នើមៗក្នុងស្រុក ២០នាក់ ដែលត្រូវបានលោក Gyotoku Koji គ្រូបង្វឹកក្រុមជម្រើសជាតិកម្ពុជា កោះហៅចូលរួមបេសកកម្មលើកនេះ រួមមានវិសាខា គឺមាន ហ៊ុល គីមហ៊ុយ, ឡេង ណូរ៉ា, អ៊ិន សូដាវីដ, ស រតនា, សារ ទី និង ស៊ិន កក្កដា។ ភ្នំពេញក្រោន មាន សឿត បារាំង, យ៉ើ ម៉ូស្លីម, អ៊ន ចាន់ប៉ូលីន និង លឹម ពិសុទ្ធ។ ព្រះខ័នរាជស្វាយរៀង មាន វីរៈ ដារ៉ា, សឿយ វិសាល, សារ៉េត គ្រីយ៉ា, Nick Taylor និង គឹម សុខយុទ្ធ។ បឹងកេត មាន តាំង ប៊ុនឆៃ និង សៀង ចន្ធា។ ISI មាន ហាវ សុខនេត្រ និងណាហ្គាវើលដ៏ មាន រ៉េត លីហេង។
គួរដឹងថា ការប្រកួតពានរង្វាន់ AFF Mitsubishi Electric Cup ឆ្នាំនេះ នឹងមានការប្រកួត ទាំងក្នុង និងក្រៅដី ខណៈបើកឆាកពូលA កម្ពុជា នឹងត្រូវជួបម៉ាឡេស៊ី នាថ្ងៃទី០៨-ធ្នូ ចុងសប្ដាហ៍នេះ នៅពហុកីឡដ្ឋានជាតិ(ស្ដាតអូឡាំពិក) រាជធានីភ្នំពេញ មុនចេញទៅជួបសិង្ហបុរី ក្រៅដីនាថ្ងៃទី១១-ធ្នូ។ រីឯប្រកួតបន្ទាប់ កម្ពុជា នឹងត្រូវជប្រកួតក្នុងដីជាថ្មី ដោយត្រូវជួបទីម័រខាងកើត នាថ្ងៃទី១៧-ធ្នូ មុនការប្រកួតបញ្ចប់ពូល ជាមួយក្រុមម្ចាស់ផ្ទះថៃ នាថ្ងៃទី២០ ខែធ្នូ ឆ្នាំ២០២៤ ខាងមុខ៕