ករណីគ្រោះថ្នាក់ចរាចរណ៍ (ម៉ូតូបុកម៉ូតូ) នៅឃុំបិតត្រាំង ស្រុកព្រៃនប់

ព្រះសីហនុ ៖ នៅថ្ងៃទី០៤.១២.២០២៤ លើដងផ្លូវជាតិលេខ៤ ចន្លោះគីឡូម៉ែត្រ ២០៩-២១០ ស្ថិតនៅភូមិចំណោតរាម ឃុំបិតត្រាំង ស្រុកព្រៃនប់ ខេត្តព្រះសីហនុ ។

មានករណីគ្រោះថ្នាក់ចរាចរណ៍ មួយកើតឡើង បង្កដោយម៉ូតូ០១គ្រឿង ម៉ាក HONDA AIRBLADE ពណ៌ក្រហមលាយខ្មៅ ពាក់ផ្លាកលេខ ព្រះសីហនុ 1K-0156 ដែលមានទិសដៅពីរាជធានីភ្នំពេញ ឆ្ពោះទៅ ខេត្តព្រះសីហនុ បើកបរដោយឈ្មោះ គីម សម្បត្តិ ភេទប្រុស អាយុ៣៤ឆ្នាំ និងអ្នករួមដំណើរចំនួន០១នាក់ឈ្មោះ ថន ថ្លឹង ភេទស្រី អាយុ៣២ឆ្នាំ មុខរបរបុគ្គលិកកាស៊ីណូ យ៉ាឌូលី អ្នកទាំង០២មានទីលំនៅភូមិស្រែចាមក្រោម ឃុំអូរជ្រៅ ស្រុកព្រៃនប់ ខេត្តព្រះសីហនុ បច្ចុប្បន្នស្នាក់នៅ ក្រុងព្រះសីហនុ ខេត្តព្រះសីហនុ (ពាក់មួកសុវត្ថិភាព) ។

លុះមកដល់ចំណុចខាងលើ បានរ៉េចង្កូតទៅខាងឆ្វេងដៃរបស់ខ្លូន ខណៈពេលនោះមាន០១គ្រឿងម៉ាក HONDA SCOOPY ពណ៌ស ពាក់ផ្លាកលេខ ព្រះសីហនុ 1J-3157 ដែលមានទិសដៅផ្ទុយគ្នា បើកបរដោយឈ្មោះ ឌន ឌូត ភេទប្រុស អាយុ៥៥ឆ្នាំ មុខរបរមេភូមិព្រៃនប់១ និងអ្នករួមដំណើរចំនួន០១នាក់ ឈ្មោះ សំ ស៊ីណា ភេទស្រី អាយុ៤២ឆ្នាំ មុខរបរកម្មកររោងចក្រ អ្នកទាំង០២ត្រូវជាប្ដីប្រពន្ធគ្នា មានទីលំនៅភូមិព្រៃនប់១ ឃុំព្រៃនប់ ស្រុកព្រៃនប់ ខេត្តព្រះសីហនុ (ពាក់មួកសុវត្ថិភាព) បានបុកចំពីមុខតែម្ដង ។

ករណីគ្រោះថ្នាក់ចរាចរណ៍ខាងលើនេះបណ្តាលឲ្យមានមនុស្សស្លាប់ចំនួន០១នាក់ និងរងរបួសចំនួន០២នាក់ ។
១.ឈ្មោះ ឌន ឌូត ភេទប្រុស អ្នកបើកបរម៉ូតូ SCOOPY (រងរបួសធ្ងន់ រួចបានស្លាប់ពេលបញ្ជូនទៅសង្គ្រោះនៅមន្ទីរពេទ្យបង្អែកខេត្តព្រះសីហនុ)
២.ឈ្មោះ ថន ថ្លឹង ភេទស្រី អ្នករូមដំណើរលើម៉ូតូ AIRBLADE (រងរបួសធ្ងន់)
៣.ឈ្មោះ គីម សម្បត្តិ ភេទប្រុស អ្នកបើកបរម៉ូតូ AIRBLADE (រងរបួសស្រាល) ។

សាកសពត្រូវបានសាច់ញាតិយកទៅធ្វើបុណ្យតាមប្រពៃណី ចំណែកជនរងគ្រោះកំពុងសង្គ្រោះបន្ទាន់នៅមន្ទីរពេទ្យបង្អែក ខេត្តព្រះសីហនុ រីឯវត្ថុតាង (ម៉ូតូ) បានយកមករក្សាទុកជាបណ្ដោះអាសន្ននៅអធិការដ្ឋាននគរបាលស្រុកព្រៃនប់។ដោយឡែកអ្នកបើកបរម៉ូតូ HONDA AIRBLADE បានយកមកសួរនាំ ដើម្បីបន្ដនីតិវិធីច្បាប់ ៕