នារីរូបស្រស់ម្នាក់ បើករថយន្តបុកម៉ូតូមិនព្រមឈប់ដោះស្រាយ បែរបើករត់បន្ដទៅបុកទ្រូងផ្លូវបាក់អស់៣កង់ រួចហើយរេចង្កូតទៅបុកដើមឈើ

ភ្នំពេញ៖ ហេតុការណ៍នេះបានកើតឡើងកាលពី ថ្ងៃទី២៧ ខែធ្នូ ឆ្នាំ២០២៤ ស្ថិតនៅតាមបណ្ដោយផ្លូវ៣១០ ខណ្ឌបឹងកេងកង និងទីតាំងឃាត់បាននៅផ្លូវជាតិលេខ២ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។ នារីរូបស្រស់ម្នាក់បានបើកបររថយន្តទៅបុកម៉ូតូ១គ្រឿងបណ្តាលឱ្យបុរសម្នាក់រងរបួសហើយមិនព្រមឈប់ដោះស្រាយទេបន្តបើករត់គេច រហូតទៅបុករះរបាំងថ្មពុះចែកទ្រូងផ្លូវខូចខាតអស់ជាច្រើនកង់ រួចរេចង្កូតទៅបុកដើមឈើ១ដើមថែមទៀតទើបទៅមុខលែងរួច ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញនារីរូបស្រស់ម្នាក់បើកបររថយន្តម៉ាក តូយូ៉តាព្រូស ពណ៌ទឹកប្រាក់ ពាក់ស្លាកលេខ ភ្នំពេញ 2BR-0776 ដោយរថយន្តខាងលើបានបង្កគ្រោះថ្នាក់ចរាចរណ៍ស្ថិតនៅតាមបណ្ដោយផ្លូវ ៣១០ ក្នុងមូលដ្ឋានខណ្ឌបឹងកេងកង ដោយបើកទៅបុកម៉ូតូ១គ្រឿង ម៉ាកស្កូពី ពណ៌ស ពាក់ស្លាកលេខភ្នំពេញ 1IU-3923 បណ្តាលឱ្យបុរសម្ចាស់ម៉ូតូរងរបួសធ្ងន់ រួចបន្តបើករថយន្តគេចខ្លួនថែមទៀត។
ករណីនេះ អ្នកឃើញហេតុការណ៍បាននាំគ្នាទាក់ទងទៅសមត្ថកិច្ចមូលដ្ឋាននិងរថយន្តសាមុយដើម្បីមកដឹកបុរសរងគ្រោះយកទៅសង្គ្រោះបន្ទាន់ភ្លាមៗផងដែរ។
ចំណែករថយន្តខាងលើបើករត់គេចចេញពីកន្លែងកើតហេតុឆ្ពោះទៅកាន់ផ្លូវជាតិលេខ២ ដោយមានប្រជាពលរដ្ឋនាំគ្នាដេញតាមឃាត់ពីក្រោយ លុះមកដល់កន្លែងកើតហេតុទល់មុខវត្តចាក់អង្រែក្រោម រថយន្តបង្កហេតុខាងលើ បានរេចង្កូតទៅបុករះរបាំងថ្មពុះចែកទ្រូងផ្លូវបង្កការខូចខាតអស់ចំនួន០៣កង់ ព្រមទាំងដួលរនាំងដែកកាត់ទ្រុងផ្លូវជាច្រើនផ្ទាំង បន្ទាប់មកក៏រេទៅស្តាំ បុកដើមទឹកដោះគោនៅទល់មុខផ្ទះប្រជាពលរដ្ឋពេញទំហឹងទើបរថយន្តអស់ល្បឿនមិនអាចបន្តដំណើរទៅមុខទៀតបាន។
ភ្លាមនោះប្រជាពលរដ្ឋបានទាក់ទងទៅកាន់សមត្ថកិច្ចមូលដ្ឋាន ទើបសមត្ថកិច្ចចុះមកឃាត់ខ្លួននារីម្ចាស់រថយន្តយកទៅធ្វើការសួរនាំនៅប៉ុស្តិ៍នគរបាលរដ្ឋបាលចាក់អង្រែក្រោម ។
ចំណែករថយន្តបង្កបានរងការខូចខាតយ៉ាងខ្លាំងមួយកំណាត់ខាងមុខរួមមានបែកកញ្ចក់និងដាច់កាឡេកង់ព្រមទាំងផ្ទុះពោងការពារសុវត្ថិភាពថែមទៀត។
សមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែង និងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញរង់ចាំម្ចាស់រថយន្តចូលខ្លួនទៅដោះស្រាយតាមនីតិវិធីច្បាប់ ៕