ភ្ញាក់ផ្អើលទាំងយប់ ករណីលោក ដាវីត ឫទ្ធិរុទ្រ ហៅ RUTH KO បាត់បង់ជីវិត ហេតុការណ៍ គ្រោះថ្នាក់ចរាចរណ៍ រវាងរថយន្តបុកផ្ទប់ជាមួយនឹងម៉ូតូពេញទំហឹង

ភ្នំពេញ៖ កាលពី ថ្ងៃទី០៦ ខែមករា ឆ្នាំ២០២៥ មានការភ្ញាក់ផ្អើលទាំងយប់ ក្រោយលោក ដាវីត ឫទ្ធិរុទ្រ ហៅ RUTH KO បាត់បង់ជីវិតក្នុងហេតុការណ៍គ្រោះថ្នាក់ចរាចរណ៍មួយ រវាងរថយន្តបុកផ្ទប់ជាមួយនឹងម៉ូតូពេញទំហឹង នៅចំណុចច្រកចូលបុរីប៉េងហួត ស្ថិយតាមបណ្តោយផ្លូវ៦០ម៉ែត្រ ក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។

នៅមុនពេលកើតហេតុគេឃើញជនរងគ្រោះ បានជិះម៉ូតូមួយគ្រឿងម៉ាក CRF ពណ៌ខ្មៅ ពាក់ស្លាកលេខ បាត់ដំបង ១AL-៩៦១៦ ធ្វើដំណើរតាមបណ្តោយផ្លូវ៦០ម៉ែត្រ ក្នុងទិសដៅពីត្បូងទៅជើងក្នុងល្បឿនលឿន ខណៈពេលជិះមកដល់ចំណុចកើតហេតុច្រកចូលបុរីប៉េងហួត ស្រាប់តែមានរថយន្តបង្កមួយគ្រឿងម៉ាក Lexus RX 330 ពណ៌ស ពាក់ស្លាកលេខ ខេមរភូមិន្ទ 0៩ ២-៤៧៧១ បើកបរដោយបុរសម្នាក់ធ្វើដំណើរតាមបណ្តោយផ្លូវ៦០ម៉ែត្រ ក្នុងទិសដៅបញ្រ្ចាស់ទិសគ្នាពីជើងមកត្បូងក្នុងល្បឿនលឿនដូចគ្នា លុះមកដល់ចំណុចកើតហេតុខាងលើ ក៏បានបួងចង្កូតបត់ឆ្វេងចូលទៅក្នុងបុរីទាំងមិនបានមើលមុខ ក៏ជ្រុលទៅបុកម៉ូតូចំពីមុខពេញទំហឹង បណ្តាលឱ្យផ្លោងជនរងគ្រោះបោកផ្ទប់ជាមួយកញ្ចក់រថយន្ត រួចបន្តធ្លាក់បោកទៅលើផ្លូវ បណ្តាលឱ្យបាក់-ក បែកក្បាលស្លាប់យ៉ាងរន្ធត់។

ប្រភពព័ត៌មានបានបញ្ជាក់ថា ភ្លាមៗនោះអ្នកបើករថយន្តបង្កត្រូវសមត្ថកិច្ចមូលដ្ឋានឃាត់ខ្លួនយកទៅប៉ុស្ថិ៍នគបាលសង្កាត់ចាក់អង្រែក្រោម ដើម្បីសាកសួរនាំ។ ក្រោយកើតហេតុ មន្ត្រីជំនាញចរាចរផ្លូវគោក បានចុះមកធ្វើការវាស់វែងយករថយន្តបង្ក និងម៉ូតូជនរងគ្រោះទៅរក្សាទុកនៅការិយាល័យចរាចរណ៍ជំនាញផ្លូវគោកនៃស្នងការដ្ឋាននគរបាលរាជធានីភ្នំពេញ រង់ចាំការដោះស្រាយនៅពេលក្រោយ។ ដោយឡែក សាកសពជនរងគ្រោះ សមត្ថកិច្ចបានធ្វើកំណត់ហេតុប្រគល់សពឱ្យទៅក្រុមគ្រួសារយកទៅធ្វើបុណ្យតាមប្រពៃណី ៕