បុរសម្នាក់ ស្រវឹងស្រាបើករថយន្ដមួយគ្រឿង បុករះម៉ូតូសណ្ដោងរុឺម៉ក បណ្តាលឲ្យរងរបួសធ្ង..ន់ស្រាល១០នាក់

ភ្នំពេញ៖ កាលពី ថ្ងៃទី៩ ខែមករា ឆ្នាំ២០២៥ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។ យ៉ាងហោចណាស់មានមនុស្ស១០នាក់បានរងរបួសធ្ងន់ស្រាលបន្ទាប់ពីត្រូវរថយន្ត១គ្រឿងបុករះម៉ូតូសណ្ដោងរុឺម៉កនៅលើស្ពានជ្រោយចង្វាខណៈម្ចាស់រថយន្តបើកបរក្នុងស្ថានភាពស្រវឹងស្រាជោកជាំ ។
មុនពេលកើតហេតុគេបានឃើញរថយន្តម៉ាកតូយូ៉តាព្រូសមួយគ្រឿង ពណ៌ស ពាក់ផ្លាកលេខ ភ្នំពេញ 2BS-5830 បើកបរដោយបុរសម្នាក់ក្នុងស្ថានភាពស្រវឹងស្រាជោកជាំ ឆ្លងកាត់ស្ពានជ្រោយចង្វាមិត្តភាពកម្ពុជា-ជប៉ុន ក្នុងល្បឿនលឿនមានទិសដៅពីលិចទៅកើត លុះមកដល់ចំណុចកើតហេតុជិតដល់ពាក់កណ្តាលស្ពាន ស្រាប់តែរថយន្តខាងលើបានបុករះទៅលើម៉ូតូសណ្តោងរ៉ឺម៉ក១គ្រឿង ពេញទំហឹងបណ្តាលឱ្យមនុស្សរួមដំណើរក្មេងចាស់ប្រុសស្រីចំនួន១០នាក់ រងរបួសធ្ងន់ស្រាល ហើយភ្លាមៗនោះរថយន្តបង្កបន្ដបើករត់គេចចុះពីលើស្ពានរួចបត់ទៅសាលាជ្រោយចង្វា តែត្រូវបានប្រជាពលរដ្ឋរួមទាំងសមត្ថកិច្ចដេញតាមឃាត់ទាន់។
ដោយឡែកជនរងគ្រោះទាំង១០នាក់ ត្រូវបានរថយន្តសង្គ្រោះបន្ទាន់ដឹកទៅមន្ទីរពេទ្យកាល់ម៉ែតសង្គ្រោះភ្លាមៗ។ សមត្ថកិច្ចបានឃាត់ខ្លួនម្ចាស់រថយន្តបង្កយកទៅធ្វើការសាកសួរព្រមទាំងបានទាក់ទងទៅកាន់សមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែង និងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំម្ចាស់រថយន្តចូលខ្លួនទៅដោះស្រាយតាមនីតិវិធីច្បាប់ ៕