បង្ក្រាបនិងទប់ស្កាត់នៅបទល្មើសដែលបាននាំចូលសាច់បង្កកខូចគុណភាព ពីប្រទេសជិតខាងឆ្លងកាត់ខេត្តកំពង់ធំ ចែកចាយនៅលើទ៏ផ្សារតាមបណ្តាររាជធានី/ខេត្ត

ខេត្តកំពង់ធំ÷ ក្រោមការដឹកនាំពីលោក សាយ វាសនា ព្រះរាជអាជ្ញារងអមសាលាដំបូងខេត្តកំពង់ធំ និងលោក ចាន់ បញ្ញាវ័ន្ត ប្រធានការិយាល័យផលិតកម្ម និងបសុព្យាបាលខេត្ត នាថ្ងៃទី១១ខែកុម្ភឆ្នាំ២០២៥នេះ បានធ្វើការដឹកនាំមន្ត្រីជំនាញពាក់ព័ន្ធ និងកងកំលាំង ចុះបង្ក្រាបនិងទប់ស្កាត់បទល្មើស ផលិតផលសត្វ សាច់សត្វបង្កក និងផលិតផលផ្សេងៗទៀតនៅលើដងផ្លូវជាតិលេខ៦ ចំណុចឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ។

នៅថ្ងៃទី១២ ខែកុម្ភៈ ឆ្នាំ២០២៥ លោក ចាន់ បញ្ញាវ័ន្ត ប្រធានការិយាល័យផលិតកម្ម និងបសុព្យាបាលខេត្ត បានបញ្ជាក់ថា ក្នុងពេលចុះបង្ក្រាបក្រុមការងារយើងបានពិនិត្យឃើញជាក់ស្តែងរួមមាន÷ ១.ផលិតផលមានដើមកំណើតពីសត្វ(សាច់សត្វបង្កក)គ្រឿងក្នុងសត្វ ពោះជ្រូក ក្រលៀន បេះដូង និងពោះវៀនធំ សរុបមានចំនួន០៦កេស ស្មើនឹង៣៦០គីឡូក្រាម។ ឆ្អឹងជំនីនិងជើងជ្រូកមានចំនួន០២កេស ស្មើនឹង១២០គីឡូក្រាម។

ជង្គង់មាន់និងទា(បក្សី)មានចំនួន០៥កេស ស្មើនឹង៣២៥គីឡូក្រាម។ ជាលទ្ធផលមានចំនួនសរុប១៣កេស ស្មើនឹង៨២៥គីឡូក្រាម(ប្រាំបីរយម្ភៃប្រាំគីឡូក្រាម)។ ២.ផលិតផលជលផលនិងផលិតផលផ្សេងៗទៀតមានចំនួនសរុបស្មើនិង១.០២០គីឡូក្រាម(មួយពាន់មួយម្ភៃគីឡូក្រាម)។ ៣.ជាលទ្ធផលក្រុមការងារបានសម្រេចធ្វើការដកហូតនូវវត្ថុតាងខាងលើកនេះមានចំនួនសរុប១,៨៤៥គីឡូក្រាម(មួយពាន់ប្រាំបីរយសឺសិបប្រាំគីឡូក្រាម) ដើម្បីធ្វើការអនុវត្តទៅតាមនិតិវិធីច្បាប់របស់ជំនាញពាក់ព័ន្ធ។

លោក សាយ វាសនា ព្រះរាជអាជ្ញារងអមសាលាដំបូងខេត្តបានដឹកនាំសម្របសម្រួលក្រុមកាងារដោយផ្ទាល់ ដើម្បីធ្វើការដុតបំផ្លាញចោលទាំងស្រុងនៅវត្ថុតាងដែលជាផលិតផលដែលបានធ្វើការបង្រ្កាបបាននេះ គឺដើម្បីសុវត្ថិភាពចំណីអាហារ ដើម្បីសុខមាលភាពសាធារណ: និងសុខភាពប្រជាពលរដ្ឋ ហើយការដុតបំផ្លាញចោលនូវវត្ថុតាងខាងលើនេះគឺធ្វើនៅក្នុងបរិវេនដីរបស់ការិយាល័យផលិតកម្ម និងបសុព្យាបាលខេត្យ នៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ៕