លោក ហៀង ម៉េង អគ្គនាយករង អញ្ជើញចុះពិនិត្យការអនុវត្តគម្រោងជួសជុលទំនប់អាងទឹកពាម ក្នុងភូមិសាស្រ្តខេត្តកំពង់ធំ

នៅថ្ងៃអង្គារ ៤កើត ខែចេត្រ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១ ខែមេសា ឆ្នាំ២០២៥ នេះ លោក ហៀង ម៉េង អគ្គនាយករងនៃអគ្គនាយកដ្ឋានកិច្ចការបច្ចេកទេស ក្នុងនាមតំណាងឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម អមដំណើរដោយលោក ថាំង វីយុទ្ធដា ប្រធាននាយកដ្ឋានវិស្វកម្ម បានដឹកនាំមន្ត្រីបច្ចេកទេសក្រសួង ចុះពិនិត្យការចាប់ផ្តើមអនុវត្តគម្រោងជួសជុលទំនប់អាងទឹកពាម ស្ថិតក្នុងឃុំម្សាក្រង ស្រុកស្ទោង ខេត្តកំពង់ធំ។
លោកអគ្គនាយករង បានបញ្ជាក់ឱ្យដឹងថា គម្រោងជួសជុលទំនប់អាងទឹកពាម មានការងារសំខាន់ៗដូចជា៖ ១)ជួសជុលទំនប់អាងទឹកពាម ប្រវែង ៦០០០ម៉ែត្រ និង ២)ជួសជុលសំណង់សិល្បការ្យ ចំនួន ៦កន្លែង។
លើសពីនេះ លោក ហៀង ម៉េង បានបញ្ជាក់ថា គម្រោងនេះនឹងជួយបង្កើនសមត្ថភាពស្រោចស្រពបន្ថែមដល់ផ្ទៃដីបង្កបង្កើនផលរដូវវស្សាចំនួន ៦២៦ហិកតា រដូវប្រាំងចំនួន ២១៩៤៩ហិកតា និងដំណាំរួមផ្សំ ១០ហិកតា ជូនដល់បងប្អូនប្រជាកសិករប្រមាណ ២៤២៦គ្រួសារ ក្នុងភូមិចំនួន១១ នៃឃុំម្សាក្រង ស្រុកស្ទោង ខេត្តកំពង់ធំ៕