អភិបាលខេត្ត ស្ទឹងត្រែងចុះពិនិត្យ និងពង្រឹងការងារការពារព្រំដែនទឹកកម្ពុជា-ឡាវ

អភិបាលខេត្តស្ទឹងត្រែងដឹកនាំកម្លាំងពាក់ព័ន្ធចុះត្រួតពិនិត្យនិងសួសុខទុក្ខកម្លាំងកងទ័ពកំពុងឈរជើងការពារព្រំដែនទឹក នៅចំណុចគោលដៅក្បាលកោះបន្ទាយ- ក្បាលកោះឈើទាលធំ- ក្បាលកោះល្ង- អន្លង់ផ្សោតព្រះរំកិល- បង្គោលលេខ០២៩និងបង្គោលលេខ០៣០ តាមខ្សែព្រំដែនទឹកជាប់ខេត្តព្រះវិហារនៃទឹកដីកម្ពុជា ឡាវ។
ក្នុងឱកាសចុះជួបសំណេះសំណាលសួសុខទុក្ខក្នុងឱកាសបុណ្យចូលឆ្នាំប្រពៃណីជាតិខ្មែយើង និងនាំយកនូវថវិកា និងគ្រឿងឧបភោគបរិភោគជូនដល់កងកម្លាំងប្រដាប់អាវុធឈរជើងការពារ តាមបន្ទាត់ព្រំដែនទឹកកម្ពុជា-ឡាវ នៅថ្ងៃទី៣១ ខែមីនា ឆ្នាំ២០២៥ ឯកឧត្តម សរ សុពុត្រា អភិបាលខេត្តមានប្រសាសន៍ថា៖នេះបានបង្ហាញពីការយកចិត្តទុកដាក់របស់ថ្នាក់ដឹកនាំក្នុងខេត្ត បានមកជួបកម្លាំងការពារព្រំដែន ហើយបានផ្សារភ្ជាប់សមរភូមិមុខនិងសមរភូមិក្រោយ ដើម្បីបង្កើនទំនាក់ទំនងគ្នាឱ្យកាន់តែល្អ ក្នុងការទ្រទ្រង់នូវជីវភាពរស់នៅ របស់កងទ័ព ដែលកំពុងឈរជើងប្រចាំការ ការពារទឹកដី។
ឯកឧត្តមមានប្រសាសន៍ សម្តែងនូវការគោរពកោតសរសើរ ចំពោះវីរភាព របស់កងកម្លាំងយើង ដែលបានលះបង់ គ្រប់បែបយ៉ាងដើម្បីបុព្វហេតុការពារបូរណភាពទឹកដី និងប្រជាជនយើង ហើយពង្រឹងបានការគ្រប់គ្រងព្រំដែនមានប្រសិទ្ធភាព។
ឯកឧត្តម អភិបាលខេត្ត ស្នើឱ្យកម្លាំងការពារព្រំដែនទាំងអស់បង្កើនកិច្ចសហប្រតិបត្តិការ ជាមួយសមត្ថកិច្ច ប្រទេសជិតខាង និងចែករំលែកព័ត៍មានគ្នាទៅវិញទៅមក ដើម្បីឱ្យក្លាយតំបន់ព្រំដែនឱ្យទៅជាព្រំដែនអភិវឌ្ឍ និងព្រំដែនមិត្តភាព មានសុខសន្តិភាពល្អ។
លោកលីមីណាអភិបាលស្រុកបុរីអូរស្វាយសែនជ័យបានចាត់ទុកថា ជាមួយវត្តមានអភិបាលខេត្ត និងថ្នាក់ដឹកនាំពាក់ព័ន្ធពិតជាបានយកចិត្តទុកដាក់ ចំពោះការងារគ្រប់គ្រង និងបានយកចិត្តទុកដាក់ក្នុងការសួសុខទុក្ខកងកម្លាំងឯកភាពឈរជើងនៅតាមខ្សែបន្ទាត់ព្រំដែនកម្ពុជាឡាវជារៀងរាល់ឆ្នាំ ។
លោកបន្តថា៖គោលបំណងមួយទៀតគឺ ដើម្បីធានាដល់ការទទួលខុសត្រូវលើការងារទប់ស្កាត់ បង្ការ បង្ក្រាប បទល្មើសឆ្លងដែនខុសច្បាប់គ្រប់ប្រភេទ ជាពិសេសនៅតាមខ្សែបន្ទាត់ព្រំដែនទឹកកម្ពុជាឡាវ ប្រកបដោយប្រសិទ្ធភាព។
សូមបញ្ជាក់ថា សកម្មភាពចុះសួសុខទុក្ខនេះ ឯកឧត្តម សរ សុពុត្រា អភិបាលខេត្តបាន ពាំនាំនូវការសួរសុខទុក្ខដល់កងកម្លាំង ព្រំដែន ពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និង ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផៃ្ទ ជាពិសេសសម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា ដែលបាននាំប្រទេសជាតិ និងរកបានសុខសន្តិភាព ស្ថិរភាព និងការអភិវឌ្ឍជូនជាតិនិងប្រជាជនយើង ៕