រថយន្តក្រុងរបស់ក្រុមហ៊ុន ឡាណា (KLN) បុករថយន្តដឹកថ្ម បណ្ដាលឲ្យអ្នកបើកបរស្លាប់ម្នាក់ និងអ្នករួមដំណើររបួសធ្ងន់ស្រាល ៤នាក់ (មូលហេតុ នៃគ្រោះថ្នាក់ចរាចរណ៍នេះ បណ្តាលមកពីរថយន្តក្រុង បើកបរប្រើប្រាស់ល្បឿន ហើយអ្នកបរងោក (ងងុយដេក))

(ក្រចេះ)៖ រថយន្តក្រុងដឹកអ្នកដំណើររបស់ក្រុមហ៊ុន ឡាណា (KLN) បានបុករថយន្តដឹកថ្មពីក្រោយបណ្ដាលឲ្យរថយន្តក្រុងខូចខាតយ៉ាងដំណំ រីឯអ្នកបើកបររថយន្តក្រុងស្លាប់ម្នាក់ និងរបួសធ្ងន់ស្រាល៤នាក់។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅលើផ្លូវជាតិលេខ៧ ក្រចេះ-ស្ទឹងត្រែង ចន្លោះបង្គោលគីឡូម៉ែត្រលេខ350-351 ត្រង់ចំណុចភូមិដីសម្បទានកាំពី ស្ថិតនៅឃុំសំបុក ស្រុកចិត្របុរី ខេត្តក្រចេះ កាលពីយប់ថ្ងៃទី១ ខែមេសា ឆ្នាំ២០២៥។

សមត្ថកិច្ចបានឲ្យដឹងថា នៅពេលកើតរថយន្តក្រុងដឹកអ្នកដំណើររបស់ក្រុមហ៊ុនឡាណា ពណ៌ស ពាក់ស្លាកលេខភ្នំពេញ 3F-0081 បើកបរដោយឈ្មោះ លឹម ពិសី អាយុ៣៥ឆ្នាំ នៅភូមិអង្គជ័យ ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ បានដឹកអ្នកដំណើរទិសដៅពីជើងទៅត្បូងក្នុងល្បឿនលឿន លុះមកដល់ចំណុចកើតហេតុ ក៏បានបុករថយន្តដឹកថ្មមិចពីក្រោយពេញទំហឹង បណ្តាលឲ្យខូចខាតរថយន្តក្រុងមួយកំណាត់ផ្នែកខាងមុខ ឯអ្នកបើកបរត្រូវគៀបជាប់នៅក្នុង រថយន្តស្លាប់ភ្លាមៗចំណែក៤នាក់ផ្សេងទៀត បានរបួសធ្ងន់ស្រាលត្រូវបានគេបញ្ជូនទៅកាន់មន្ទីពេទ្យ។
អ្នកដំណើរដែលរងរបួសរួមមាន៖
*ទី១៖ ឈ្មោះ ឆេង ភា អាយុ៤៨ឆ្នាំ មានទីលំនៅភូមិហាន់ជ័យ ឃុំក្រូចសើច ស្រុកកំពង់សៀម ខេត្តកំពង់ចាម (របួសធ្ងន់)
*ទី២៖ ឈ្មោះ មាស ស្រីនាង ភេទស្រី អាយុ៣២ឆ្នាំ ទីលំនៅភូមិត្រីតា ឃុំទានទា ស្រុកកំពង់ត្របែក ខេត្តព្រៃវែង (របួសធ្ងន់)
*ទី៣៖ ឈ្មោះ ថាច់ សាន អាយុ៥៤ឆ្នាំ ទីលំនៅភូមិតេន ឃុំតេន ស្រុកកូនមុំ ខេត្តរតនគីរី (របួសស្រាល)
*ទី៤៖ ឈ្មោះ ប៊ុន ទិត្យ អាយុ២៦ឆ្នាំ ទីលំនៅភូមិកាផុន ឃុំភ្លុក ស្រុកសេសាន ខេត្តស្ទឹងត្រែង (របួសស្រាល)។
សមត្ថកិច្ចបញ្ជាក់ពី មូលហេតុ នៃគ្រោះថ្នាក់ចរាចរណ៍នេះ បណ្តាលមកពីរថយន្តក្រុង បើកបរប្រើប្រាស់ល្បឿនហើយអ្នកបរងោក (ងងុយដេក)។ ក្រោយពេលកើតហេតុរួច អ្នកបើកបររថយន្តម៉ាកហ៊ីយ៉ាន់ដាយដឹកថ្មមិច បានរត់គេចខ្លួនបាត់ពីកន្លែងកើតហេតុ ហើយជនរងគ្រោះ ត្រូវបានដឹកបញ្ជូនទៅសម្រាកព្យាបាលនៅមន្ទីរពេទ្យបង្អែកក្រចេះ ចំណែកសពជនរងគ្រោះបានប្រគល់ជូនក្រុមគ្រួសារ នៃសពយកទៅធ្វើបុណ្យតាមប្រពៃណី។
វត្ថុតាងរថយន្តក្រុងខូចធ្ងន់ ត្រូវបានជំនាញសណ្តាប់ធ្នាប់ យកមករក្សាទុកជាបណ្ដោះអាសន្ន នៅអធិការដ្ឋាននគរបាលស្រុកចិត្របុរី ដើម្បីបន្តនីតិវិធី៕