ឯកឧត្តម ចាន់ ស៊ីណាត រដ្ឋលេខាធិការ អញ្ជើញដឹកនាំក្រុមការងារបច្ចេកទេសចុះពិនិត្យវឌ្ឍនភាពគម្រោងប្រព័ន្ធរំដោះទឹក និងពង្វាងទឹកចេញពីរាជធានីភ្នំពេញ ក្នុងភូមិសាស្ត្រខេត្តតាកែវ

នៅថ្ងៃអង្គារ ៤កើត ខែចេត្រ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១ ខែមេសា ឆ្នាំ២០២៥ នេះ ឯកឧត្តម ចាន់ ស៊ីណាត រដ្ឋលេខាធិការ ក្នុងនាមតំណាងដ៏ខ្ពង់ខ្ពស់របស់ឯកឧត្តម ថោ ជេដ្ឋា រដ្ឋមន្ដ្រីក្រសួងធនធានទឹក និងឧតុនិយម បានដឹកនាំក្រុមការងារបច្ចេកទេស អញ្ជើញចុះពិនិត្យវឌ្ឍនភាពនៃការដ្ឋានសាងសង់ប្រព័ន្ធរំដោះទឹក និងពង្វាងទឹកជំនន់ស្ទឹងតូច ចេញពីរាជធានីភ្នំពេញ និងខេត្តកណ្តាល ត្រង់ភូមិសាស្រ្តស្ទឹងទន្លេបាទីលើ ក្នុងឃុំព្រែករកា ស្រុកបាទី ខេត្តតាកែវ។
ក្នុងឱកាសនោះ ឯកឧត្ដមរដ្ឋលេខាធិការ បានជួបសំណេះសំណាលប្រកបដោយភាពស្និទ្ធស្នាលជាមួយអាជ្ញាធរ និងបងប្អូនប្រជាពលរដ្ឋដែលជាអ្នកទទួលផលផ្ទាល់ពីប្រព័ន្ធរំដោះទឹក និងពង្វាងទឹកខាងលើ។ ឯកឧត្តមរដ្ឋលេខាធិការបានបញ្ជាក់ថា ការងារសាងសង់ប្រព័ន្ធរំដោះទឹក និងពង្វាងទឹកមិនទាន់បញ្ចប់នៅឡើយទេ ក៏ប៉ុន្តែបងប្អូនប្រជាកសិករក្នុងឃុំរកាបានទឹកធ្វើស្រែប្រាំងរហូតដល់ពីរដងក្នុងឆ្នាំនេះ ហើយបានប្រារព្ធធ្វើពិធីអុំទូកលេងកម្សាន្តក្នុងពេលកន្លងមកទៀត។ ទន្ទឹមនឹងនេះ បងប្អូនប្រជាកសិករបានសម្តែងនូវការអបអរសាទរស្វាគមន៍គាំទ្រ និងចូលរួមយ៉ាងកក់ក្តៅចំពោះគម្រោងនេះ៕