បញ្ជូនខ្លួនអាជីវករម្នាក់ ទៅតុលាការពាក់ព័ន្ធករណីចាយសែកស្អុយជាង១០ ម៉ឺនដុល្លារអាមេរិក

ភ្នំពេញ ៖ កម្លាំងសមត្តកិច្ចការិយាល័យនគរបាលព្រហ្ម ទណ្ឌកម្រិតស្រាលរាជធានីភ្នំពេញ កាលពីរសៀលថ្ងៃទី០១ ខែ មេសា ឆ្នាំ២០២៥ បានធ្វើការចាប់ឃាត់អាជីវករម្មាក់នៅចំណុចស្ថានីយប្រេងឥន្ធនៈភីធីធី ផ្លូវលេខ៤៣០ សង្កាត់ទួលទំពូង២ ខណ្ឌ ចំការមន រាជធានីភ្នំពេញ ពាក់ព័ន្ធករណីចាយសែកស្អុយប្រមាណជាង១០ មុឺនដុល្លារអាមេរិក ។
ការចាប់ និងបញ្ជូនខ្លួនអាជីវកររូបនោះសមត្តកិច្ចបានអនុវត្តទៅតាមដីកាបង្គាប់ឲ្យចាប់ខ្លួនរបស់ចៅ ក្រមស៊ើបសួរសាលាដំបូងរាជធានីភ្នំពេញ ។ តាមដីកាបង្គាប់ឲ្យចាប់ខ្លួនបានបញ្ជាក់ថា ក្រោយពីបានពិនិត្យលើសំណុំរឿងចប់សព្វគ្រប់ យល់ឃើញថា ជនត្រូវចោទឈ្មោះ ម៉េង តារា ភេទប្រុស អាយុ៣១ ឆ្នាំ ទីលំនៅផ្ទះលេខ២១B ផ្លូវលេខ៤១០ ភូមិស្ទឹងជ្រៅ សថ្កាត់ដើមមៀន ក្រុងតាខ្មៅ ខេត្តកណ្តាល ត្រូវបានដាក់ឲ្យស្ថិតនៅក្រោមការពិនិត្យពីបទ.មិនបំពេញកាតព្វកិច្ចចំពោះឧបករណ៍អាចជួញដូរបាន ប្រព្រឹត្តនៅចំណុច រាជធានីភ្នំពេញ កាលពីថ្ងៃទី០១ ខែវិច្ឆិកា ឆ្នាំ២០២៤ បទល្មើសដែលមានចែងឲ្យផ្តន្ទាទោសតាមបញ្ញត្តិមាត្រា ២៣១ នៃច្បាប់ស្តីពី ឧបរណ៍អាចជួញដូរបាន និងប្រត្តិបត្តការទូទាត់ប្រាក់ ។
បើតាមប្រភពព័ត៌មានបង្ហើបឲ្យដឹងថា ជនសង្ស័យបានជាប់ពាក់ព័ន្ធប្រាក់អ្នកដទៃប្រមាណជាង១០ ម៉ឺនដុល្លារអាមេរិក ក្នុងកម្ចីដើម្បីយកទៅធ្វើដើមទុករកស៊ី ដោយបានដាក់តម្កល់មូលប្បទានប័ត្រនៅធនាគារ ដើម្បីធានានូវការទូទាត់សងប្រាក់ឲ្យដើមបណ្តឹងវិញ ។ លុះដល់ថ្ងៃកំណត់ដើមបណ្តឹងបានយកសែកនោះ ទៅដកប្រាក់ពីធនាគារបែរជា (សែកស្អុយ) គ្មានសាច់ប្រាក់ ទើបម្ចាស់បំណុលប្តឹងឲ្យសមត្តកិច្ចឲ្យចាត់ការតាមផ្លូវច្បាប់ ។ ក្រោយចាប់ខ្លួនជនសង្ស័យសមត្តកិច្ចបានវាស់កម្ពស់ និងរៀបចំបែបបទនាំទៅប្រគល់ជូនចៅក្រមស៊ើបសួរសាលាដំបូងរាជធានីភ្នំពេញ នារសៀលថ្ងៃទី០២ ខែមេសា ឆ្នាំ២០២៥ ដើម្បីបន្តនីតិវិធី ៕