Dani Alves និងភរិយាជប់លៀងរយៈពេលពីរថ្ងៃជាប់គ្នាបន្ទាប់ពីជៀសផុតការផ្ដន្ទាទោសបំពានផ្លូវភេទ
អតីតខ្សែការពារក្រុម Barcelona និងជម្រើសជាតិប្រេស៊ីល Dani Alves បានប្រារព្ធពិធីជប់លៀងជាមួយភរិយារបស់គាត់ឈ្មោះ Joana Sanz រយៈពេលពីរថ្ងៃជាប់គ្នា បន្ទាប់ពីតុលាការកំពូលនៃ តំបន់Catalonia របស់អេស្ប៉ាញលុបចោលការផ្តន្ទាទោសពីបទរំលោភផ្លូវភេទរបស់គាត់។
តុលាការបានសម្រេចថាសាលក្រមដើមមាន “ភាពមិនស៊ីសង្វាក់គ្នា និងភាពផ្ទុយគ្នា” ដែលនាំទៅដល់ការលុបចោលការផ្តន្ទាទោសលើការរំលោភផ្លូវភេទរបស់ Alves កាលពីថ្ងៃទី ២៨ ខែមីនា។
ដំណឹងនេះបានកើតឡើងជាការធូរស្រាលយ៉ាងសំខាន់ដល់ Alves ដែលត្រូវបានកាត់ទោសក្នុងឆ្នាំ ២០២៣ ពីបទរំលោភផ្លូវភេទលើនារីម្នាក់នៅក្នុងក្លឹបរាត្រី Barcelona ។
បន្ទាប់ពីសាលក្រមត្រូវបានប្រកាស Alves បានត្រឡប់ទៅផ្ទះ Barcelona វិញនៅពេលរសៀល ប៉ុន្តែបានបដិសេធមិនធ្វើអត្ថាធិប្បាយលើសេចក្តីសម្រេចនេះបើយោងតាមកាសែតអេស្ប៉ាញ Marca ។
Sanz ភរិយារបស់ Alves ក៏បានចូលបណ្ដាញសង្គមដើម្បីបង្ហាញពីអារម្មណ៍របស់នាង។ នាងបានសរសេរនៅលើ Instagram ថា “ខ្ញុំត្រូវបានគេរិះគន់ ប្រមាថ គំរាមកំហែង និងធ្វើបាបអស់រយៈពេល ២ឆ្នាំដូចជាខ្ញុំត្រូវបានចោទប្រកាន់។ ទោះបីជាមានការបំផ្លិចបំផ្លាញពីប្រព័ន្ធផ្សព្វផ្សាយ និងសាធារណជនក៏ដោយ ខ្ញុំបានប្រកាន់ជំហររឹងមាំ មិនបោះបង់តាមការរំពឹងទុក រក្សាការជឿជាក់របស់ខ្ញុំ និងការពារគំនិតរបស់ខ្ញុំដោយមិនធ្វើឱ្យអ្នកដទៃងងឹតងងុលឡើយ។ សូមឈប់បង្ហាញការស្អប់ខ្ពើមចំពោះមនុស្សដែលអ្នកស្ទើរតែមិនស្គាល់។”
Alves រកប្រាក់បានជិត ៦០លានដុល្លារក្នុងរយៈពេលប៉ុន្មានឆ្នាំមកនេះ រួមទាំងប្រាក់បៀវត្សរ៍ ១១លានដុល្លារក្នុងមួយឆ្នាំៗអំឡុងពេលគាត់លេងឱ្យក្លឹប Barcelona ។ បន្ទាប់ពីផ្លាស់ទៅក្លឹប UNAM ក្នុងប្រទេសម៉ិកស៊ិកក្នុងឆ្នាំ២០២២ Alves រកបាន ៣២៥,០០០ ដុល្លារក្នុងមួយសប្តាហ៍។ ទោះជាយ៉ាងណាបន្ទាប់ពីការចាប់ខ្លួនក្លឹប UNAM បានបញ្ចប់កិច្ចសន្យារបស់លោកនិងទាមទារសំណងចំនួន ៥ លានដុល្លារ។
ឥឡូវនេះការផ្តន្ទាទោសរបស់គាត់ត្រូវបានលុបចោល Alves កំពុងពិចារណាលើបណ្តឹងបកទៅកាន់ក្លឹប UNAM វិញសម្រាប់ការបញ្ចប់កិច្ចសន្យារបស់គាត់ដោយគ្មានមូលហេតុ។ គាត់គ្រោងនឹងស្វែងរកសំណងចំនួន ២លានដុល្លារសម្រាប់ការបញ្ចប់ការងារនេះ និងបន្តចាត់វិធានការផ្លូវច្បាប់ចំពោះ ការខូចខាតខាងសីលធម៌ ការបរិហារកេរ្តិ៍ និងការបណ្តេញចេញដោយអយុត្តិធម៌។
Alves វ័យ ៤១ឆ្នាំត្រូវបានគេចាត់ទុកថាជាខ្សែការពារដ៏ល្អបំផុតដោយបានឈ្នះពានរង្វាន់ចំនួន ៤២ក្នុងការលេងឱ្យក្លឹបធំៗនៅអឺរ៉ុបដូចជា Barcelona, Juventus និង PSG៕
