លោក ផាង វី បន្តដឹកនាំក្រុមវិស្វករបច្ចេកទេសក្រសួង ចុះពិនិត្យស្ថានភាពសំណង់អាងទឹក និងប្រព័ន្ធធារាសាស្ត្រធំៗ ក្នុងខេត្តបាត់ដំបង ក្រោយកើតមានបាតុភូតរញ្ជួយដីនៅក្នុងប្រទេសមីយ៉ាន់ម៉ា

នៅថ្ងៃពុធ ៥កើត ខែចេត្រ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២ ខែមេសា ឆ្នាំ២០២៥នេះ អនុវត្តតាមការណែនាំ និងការចង្អុលបង្ហាញដ៏ខ្ពង់ខ្ពស់របស់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម លោក ផាង វី ប្រធាននាយកដ្ឋានធារាសាស្រ្តកសិកម្ម បានបន្តដឹកនាំវិស្វករបច្ចេកទេសក្រសួង និងមន្ទីរធនធានទឹក និងឧតុនិយមខេត្តបាត់ដំបង ចុះពិនិត្យស្ថានភាពសំណង់អាងទឹក និងប្រព័ន្ធធារាសាស្ត្រធំៗ ដើម្បីធានាដល់សុវត្ថិភាពទំនប់ ក្រោយពីកើតមានបាតុភូតរញ្ជួយដីថ្មីៗនេះក្នុងប្រទេសមីយ៉ាន់ម៉ា។
ក្នុងឱកាសនោះ លោក ផាង វី និងក្រុមការងារបច្ចេកទេស បានចុះពិនិត្យស្ថានភាពសំណង់ ទី១)អាងទឹកពហុបំណងបាត់ដំបង(សេកសក) ស្ថិតក្នុងឃុំផ្លូវមាស ស្រុករតនមណ្ឌល ខេត្តបាត់ដំបង និង ទី២)សំណង់កាត់ស្ទឹងនៃប្រព័ន្ធធារាសាស្រ្តកង្ហត ស្ថិតក្នុងឃុំចែងមានជ័យ ស្រុកបាណន់ ខេត្តបាត់ដំបង។
សូមជម្រាបថា អាងទឹកពហុបំណងបាត់ដំបង(សេកសក) បានសាងសង់ឡើងក្នុងឆ្នាំ២០១៤ ក្រោមហិរញ្ញប្បទានរបស់រដ្ឋាភិបាលនៃសាធារណរដ្ឋប្រជាមានិតចិន។ ទំនប់អាងទឹកនេះមានផ្ទៃអាងប្រមាណ ៣០៧០ហិកតា និងប្រភពទឹកពីស្ទឹងក្រញូង ស្ទឹងបឡាង និងផ្ទៃរងទឹកភ្លៀង ដែលមានលទ្ធភាពរក្សាទឹកទុកក្នុងរដូវវស្សាប្រមាណ ១៩៣លានម៉ែត្រគូប។ ចំណែក សំណង់កាត់ស្ទឹងនៃប្រព័ន្ធធារាសាស្រ្តកង្ហត សាងសង់ក្នុងឆ្នាំ២០១០ ក្រោមហិរញ្ញប្បទានរបស់រដ្ឋាភិបាលនៃសាធារណរដ្ឋប្រជាមានិតចិន មានប្រភពទឹកពីអាងទឹកពហុបំណងបាត់ដំបង(សេកសក) និងផ្ទៃរងទឹកភ្លៀង ដែលមានសក្តានុពលអាចស្តុកទឹកបានចំនួន ១៧លានម៉ែត្រគូប។
លោកប្រធាននាយកដ្ឋានធារាសាស្ត្រកសិកម្ម បានបញ្ជាក់ឱ្យដឹងថា តាមការចុះពិនិត្យជាក់ស្តែង ស្ថានភាពទំនប់អាងទឹកទាំងពីរទីតាំងនេះមិនទទួលរងការប៉ះពាល់ពីបាតុភូតរញ្ជួយដីនោះទេ។
សូមបញ្ជាក់ថា កាលពីវេលាម៉ោង ១៣និង២០នាទី ថ្ងៃទី២៨ ខែមីនា ឆ្នាំ២០២៥នេះ មានបាតុភូតរញ្ជួយដីកើតឡើងស្ថិតនៅចម្ងាយ ១៦គីឡូម៉ែត្រភាគពាយ័ព្យនៃទីក្រុងសាហ្គាំង(Sagaing) ក្នុងប្រទេសមីយ៉ាន់ម៉ា។ ការរញ្ជួយនេះបានកើតឡើងនៅក្នុងស្រទាប់ស្នូលផែនដី ជម្រៅប្រមាណ ១០គីឡូម៉ែត្រ និងមានឥទ្ធិពលមកស្រទាប់ខាងលើនៃផែនដីក្នុងកម្រិតរញ្ជួយ ៧,៧ រ៉ិចទ័រ ដែលបង្កឱ្យមានផលប៉ះពាល់ដល់ប្រទេសមួយចំនួនរួមមាន៖ ប្រទេសមីយ៉ាន់ម៉ា បង់ក្លាដែស ឥណ្ឌា ឡាវ ថៃ វៀតណាម និងប្រទេសចិន។ ដោយឡែក ប្រទេសកម្ពុជា ក៏ទទួលរងនូវឥទ្ធិពលនេះផងដែរ តែក្នុងកម្រិតតិចតួចប៉ុណ្ណោះ៕