ឯកឧត្ដម ចាន់ ស៊ីណាត រដ្ឋលេខាធិការ អញ្ជើញចុះពិនិត្យសមិទ្ធផលនៃការជួសជុលឡើងវិញប្រព័ន្ធធារាសាស្ដ្រទំនប់អាងព្រៃក្ដួច ស្ថិតក្នុងភូមិសាស្ដ្រស្រុកត្រាំកក់ ខេត្តតាកែវ

នៅល្ងាចថ្ងៃពុធ ៥កើត ខែចេត្រ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២ ខែមេសា ឆ្នាំ២០២៥ នេះ ឯកឧត្តម ចាន់ ស៊ីណាត រដ្ឋលេខាធិការ ជាតំណាងដ៏ខ្ពង់ខ្ពស់របស់ ឯកឧត្តម ថោ ជេដ្ឋា រដ្ឋមន្ដ្រីក្រសួងធនធានទឹក និងឧតុនិយម បានដឹកនាំមន្ដ្រីបច្ចេកទេសក្រសួងអញ្ជើញចុះត្រួតពិនិត្យមើលលើសមិទ្ធផលនៃប្រព័ន្ធធារាសាស្រ្តទំនប់អាងព្រៃក្តួច ដែលបានជួសជុលស្ដារឡើងវិញ ស្ថិតក្នុងភូមិសាស្ដ្រស្រុកត្រាំកក់ ខេត្តតាកែវ។
ឯកឧត្ដមរដ្ឋលេខាធិការមានប្រសាសន៍ថា ការជួសជុលឡើងវិញនៃប្រព័ន្ធធារាសាស្ដ្រទំនប់អាងព្រៃក្ដួចនេះ ក្រោមហិរញ្ញប្បទានរបស់ធនាគារអភិវឌ្ឍន៍អាស៊ី (ADB) ដោយសហការយ៉ាងជិតស្និទ្ធជាមួយនឹងក្រសួងសេដ្ឋកិច្ច និងហិរញ្ញវត្ថុ ក្រសួងធនធានទឹក និងឧតុនិយម និងក្រសួងកសិកម្ម រុក្ខាប្រមាញ់ និងនេសាទ។
នាឱកាសនោះដែរ ឯកឧត្ដមរដ្ឋលេខាធិការក៏បានចុះពិនិត្យស្រះទឹកខ្នាតធំមួយកន្លែង ដែលបានសាងសង់ឡើងតាមរយៈគម្រោងហិរញ្ញប្បទានរបស់ធនាគារអភិវឌ្ឍន៍អាស៊ី (ADB) សម្រាប់ផ្ដល់ជូនសហគមន៍កសិកម្មស្លាគូរសម្រាប់ប្រើប្រាស់ដើម្បីទប់ទល់នឹងការប្រែប្រួលអាកាសធាតុ ស្ថិតក្នុងស្រុកត្រាំកក់ ខេត្តតាកែវ៕