ឯកឧត្តមរដ្ឋមន្ត្រី កែវ រតនៈ ក្រើនរំលឹកដល់បងប្អូនកងទ័ព ត្រូវចូលរួមថែរក្សាការពារធនធានធម្មជាតិ និងអនុវត្តគោលនយោបាយរបស់ប្រមុខរាជរដ្ឋាភិបាល ឱ្យបានរឹងមាំ

ភ្នំពេញ៖ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានក្រើនរំលឹកដល់បងប្អូនកងទ័ព ត្រូវចូលរួមថែរក្សាការពារធនធានធម្មជាតិ និងអនុវត្តគោលនយោបាយរបស់ប្រមុខរាជរដ្ឋាភិបាល លើវិស័យការពារជាតិ ឱ្យបានរឹងមាំ និងទទួលបានជោគជ័យ ជូនជាតិមាតុភូមិ និងប្រជាជន។
ឯកឧត្តមរដ្ឋមន្ត្រី កែវ រតនៈ បានថ្លែងបែបនេះ ក្នុងពិធីជួបសំណេះសំណាល និងសួរសុខទុក្ខនាយទាហាន នាយទាហានរង និងពលទាហាន នៃកងពលតូចអន្តរាគមន៍លេខ១៤ ស្ថិតក្នុងឃុំត្នោតជុំ ស្រុកក្រគរ ខេត្តពោធិ៍សាត់ នាថ្ងៃទី២ ខែមេសា ឆ្នាំ២០២៥នេះ ដើម្បីអបអរសាទរ ពីធីបុណ្យចូលឆ្នាំថ្មី ប្រពៃណីជាតិខ្មែរ ដែលនឹងខិតជិតមកដល់នាពេលខាងមុខ ដោយមានការចូលរួមពីឯកឧត្តម យឹម វិសិដ្ឋ ប្រធានអាជ្ញាធរអគ្គិសនីកម្ពុជា, ឯកឧត្តម អូន ហេមរិទ្ធ អគ្គនាយករងអគ្គិសនីកម្ពុជា, លោក ងួន ប៉ោសេង អភិបាលរងខេត្ត ព្រមទាំងប្រតិភូមអមដំណើរ និងអាជ្ញាធរមូលដ្ឋានមួយចំនួនទៀត។
ក្នុងឱកាសនោះ ឯកឧត្តមរដ្ឋមន្ត្រី កែវ រតនៈ ក៏បាននាំយកអំណោយដែលបានមកពីការចូលរួមឧបត្ថម្ភ របស់ក្រសួងរ៉ែ និងថាមពល, អគ្គិសនីកម្ពុជា, អ្នកស្ម័គ្រចិត្តនិយោជិតអគ្គិសនីកម្ពុជា និងអាជ្ញាធរអគ្គិសនីកម្ពុជា ផ្តល់ជូនអង្គភាពកងពលតូចអន្តរាគមន៍លេខ១៤រួមមាន៖ មីចំនួន ៧០០កេស, ទឹកត្រី និងទឹកស៊ីអ៉ីវចំនួន ៧០០យួរ, ប៊ីចេងចំនួន ៤០កេសធំ, ត្រីខ F4 ចំនួន ៧០កេសធំ, ឆៃប៉ុវផ្អែមចំនួន ៧០០គីឡូក្រាម, ត្រីងៀតចំនួន ៨០គីឡូក្រាម, សាច់ក្រកចំនួន ៨០គីឡូក្រាម, ប្រហុកចំនួន ៨០គីឡូក្រាម និងថវិកា ២ម៉ឺនដុល្លារ សម្រាប់ជួបជុំក្នុងឱកាសបុណ្យចូលឆ្នាំថ្មី ដែលឈានចូលមកដល់នាពេលខាងមុខនេះ។ ដោយឡែកបងប្អូនកងទ័ព ក្នុងម្នាក់ៗទទួលបាន គ្រឿងឧបភោគបរិភោគ និងថវិកាមួយចំនួន។
គួរជម្រាបជូនថា នាព្រឹកថ្ងៃដដែលនេះ ឯកឧត្តមរដ្ឋមន្ត្រី កែវ រតនៈ ក៏បានចុះសួរសុខទុក្ខ និងនាំយកអំណោយ ប្រគល់ជូនដល់កងវរសេនាតូចថ្មើរជើងលេខ៥៥៦ ចំណុះឱ្យទីបញ្ជាការដ្ឋានតំបន់ប្រតិបត្តិការសឹករងពោធិ៍សាត់ ឈរជេីងឃុំថ្មដា ស្រុកវាលវែង ដោយក្នុងនោះរួមមាន៖ មីចំនួន ១០០កេស, ទឹកត្រី និងទឹកស៊ីអ៉ីវចំនួន ១០០យួរ, ប៊ីចេងចំនួន ២០កេសធំ, ត្រីខចំនួន ២០កេសធំ, ឆៃប៉ុវផ្អែមចំនួន ១០០គីឡូក្រាម, ត្រីងៀតចំនួន ៥០គីឡូក្រាម, សាច់ក្រកចំនួន ៥០គីឡូក្រាម និងប្រហុកចំនួន ៥០គីឡូក្រាមផងដែរ ៕