រដ្ឋបាលស្រុកកោះញែក រៀបចំសង្ក្រាន្តវិទ្យាល័យហ៊ុន សែន កោះញែក ដើម្បីថែរក្សាប្រពៃណី វប្បធម៌ផង និងបង្កភាពសប្បាយរីករាយផង

មណ្ឌលគិរី ៖ រដ្ឋបាលស្រុកកោះញែក រៀបចំសង្ក្រាន្តវិទ្យាល័យហ៊ុន សែន កោះញែក ដើម្បីថែរក្សាប្រពៃណី វប្បធម៌ផង និងបង្កភាពសប្បាយរីករាយ ដើម្បីចូលរួមអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំម្សាញ់ សប្ដស័ក ព.ស.២៥៦៩ ពិធីនេះធ្វើឡើងក្រោមវត្តមាន លោក ចាន់ រតនា អភិបាលរងខេត្តមណ្ឌលគិរី រួមទាំងលោក កែវ សូត្រ ប្រធានក្រុមប្រឹក្សាស្រុកកោះញែក លោក សី ទូច អភិបាលស្រុក មន្រ្តីរាជការ កងកម្លាំងប្រដាប់អាវុធទាំងបី លោកគ្រូ អ្នកគ្រូ ប្រជាពលរដ្ឋ និងសិស្សានុសិស្សយ៉ាងច្រើនកុះករ ដែលប្រព្រឹត្តទៅនៅវិទ្យាល័យហ៊ុន សែន កោះញែក នាថ្ងៃទី០២ ខែមេសា ឆ្នាំ២០២៥។

លោក ចាន់ រតនា អភិបាលរងខេត្ត បានថ្លែងនូវការកោតសរសើរដល់រដ្ឋបាលស្រុក និងវិទ្យាល័យហ៊ុន សែនកោះញែក រួមទាំងសប្បុរសជន និងសិស្សានុសិស្សទាំងអស់ ដែលបានខិតខំសហការគ្នា ក្នុងការរៀបចំព្រឹត្តិការណ៍សង្រ្កាន្តនាពេលនេះ ដើម្បីចូលរួម ថែរក្សា នូវតម្លៃប្រពៃណី វប្បធម៌ជាតិ ឲ្យបានល្អផូរផង់។ លោក បញ្ជាក់ថា រាជរដ្ឋាភិបាលកម្ពុជា ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី បានកំពុងដឹកនាំមាតុភូមិ កម្ពុជាលើ គន្លងមាគារដ៏ត្រឹមត្រូវ ដោយរក្សាបាននូវសុខសន្តិភាព និងការអភិវឌ្ឍន៍លើគ្រប់វិស័យ។ លោក អភិបាលរងខេត្ត បានក្រើនរំលឹកដល់បងប្អូនប្រជាពលរដ្ឋទាំងអស់ សូមចូលរួមគោរពច្បាប់ចរាចរណ៍ លើកកម្ពស់សោភណ្ឌភាព តាមរយៈ ការតុបតែងផ្ទះសម្បែង គេហដ្ឋាន រក្សាសណ្តាប់ធ្នាប់សាធារណៈ បង្ការនិងមានការប្រុងប្រយ័ត្ន គ្រោះអគ្គីភ័យ។ ចំណែក ក្មួយៗ សិស្សានុសិស្ស និងយុវជនទាំងអស់ ត្រូវជៀសឲ្យឆ្ងាយ ពីអំពើឧបាយមុខផ្សេងៗ ដូចជា៖ ការប្រើប្រាស់គ្រឿងញៀន ក្មេងទំនើង ល្បែងស៊ីសងគ្រប់ប្រភេទ ដែលសង្គមជាតិ កំពុងទប់ស្កាត់ និងស្អប់ខ្ពើមជាទីបំផុត ហើយខិតខំកសាងខ្លួនឱ្យក្លាយជា សិស្សល្អ កូនល្អ មិត្តល្អ ប្រឹងរៀនសូត្រឱ្យពូកែ និងចូលរួមថែរក្សានូវ វប្បធម៌ អរិយធម៌របស់ ដូនតាយើង ដែលខិតខំបង្កើតមក ជាពិសេស អភិវឌ្ឍន៍ខ្លួនឱ្យបានល្អប្រសើរ ដើម្បីអនាគតផ្ទាល់ខ្លួនផង និងរួមចំណែកអភិវឌ្ឍសង្គមជាតិផង។

លោក សី ទូច អភិបាលស្រុកកោះញែក បានឲ្យដឹងថា ការៀបចំសង្ក្រាន្តនេះឡើង ក្នុងគោលបំណង ដាស់អារម្មណ៍ដល់ក្មួយៗ សិស្សានុសិស្ស មាតាបិតា អាណាព្យាបាល ព្រមទាំងគ្រប់អ្នកពាក់ពន្ធ័ទាំងអស់ បានចូលរួមថែរក្សានូវប្រពៃណី វប្បធម៌ ដ៏ល្អផូរផង់ របស់យើងដែលមានតាំងពីយូរលង់ណាស់មកហើយ ។ លោក អភិបាលស្រុក បានថ្លែងអំណរដល់ថ្នាក់ដឹកនាំខេត្តមណ្ឌលគិរី រួមទាំងសប្បុរសជន ប្រជាពលរដ្ឋ លោកគ្រូ អ្នកគ្រូ និងជាពិសេស គឺក្មួយៗសិស្សានុសិស្សនៃវិទ្យាល័យ ហ៊ុន សែន កោះញែកតែម្តង ដែលបានចូលរួមឧបត្ថម្ភ ដល់ការរៀបចំសង្ក្រាន្ត ដើម្បីបង្កភាពសប្បាយរីករាយ។
នាឳកាសនោះ លោក ចាន់ រតនា អភិបាលរងខេត្ត រួមទាំងជ្ញាធរមូលដ្ឋាន បានចុះពិនិត្យតាមស្តង់លក់ដូររបស់សិស្សានុសិស្ស នៅសង្ក្រាន្តវិទ្យាល័យហ៊ុន សែន កោះញែក ហើយមានលេងល្បែងប្រជាប្រិយដូចជា ល្បែងដំណ្តើមស្លឹកឈើ ល្បែងលោតបាវ ល្បែងលាក់កន្សែង ល្បែងវាយក្អម ល្បែងទាញ់ព្រ័ត ល្បែងប៉ូមទឹកដាក់ដប ល្បែងចោលឈូង ល្បែងរាំទូលក្អម ល្បែងឡើងសសរខ្លាញ់ ការប្រឡងចម្រៀង និងការរាំលេងកម្សាន្តយ៉ាងសប្បាយរីករាយផងដែរ៕