បុរសដែលប្រើហិង្សាលើប្រពន្ធ នៅខេត្តរតនគិរី ត្រូវតុលាការសម្រេចឃុំខ្លួនដាក់ពន្ធនាគារ

(រតនគិរី)៖ ប្ដីដែលវាយទាត់ធាក់យ៉ាងព្រៃផ្សៃ ទៅលើប្រពន្ធមានកូនខ្ចី នៅភូមិប៉ាអរ ឃុំកិចុង ស្រុកបរកែវ ខេត្តរតនគិរី កាលពីថ្ងៃទី៣១ ខែមីនា ឆ្នាំ២០២៥ ត្រូវបានសាលាដំបូងខេត្ត សម្រេចឃុំខ្លួនដាក់ពន្ធនាគារ ពីបទ «ហិង្សាប្រព្រឹត្តដោយសហព័ទ្ធ ឬអនីតិសង្វាសជន»។
សេចក្ដីប្រកាសព័ត៌មានរបស់សាលាដំបូងខេត្តរតនគិរី ដែលបណ្ដាញព័ត៌មាន ទទួលបាននៅថ្ងៃទី៣ ខែមេសា ឆ្នាំ២០២៥នេះ បានបញ្ជាក់ថា សាលាដំបូងខេត្តរតនគិរី បានទទួលចាត់ការសំណុំរឿងព្រហ្មទណ្ឌលេខ ១៤៧ ចុះថ្ងៃទី២ ខែមេសា ឆ្នាំ២០២៥ ពាក់ព័ន្ធនឹងជនត្រូវចោទម្នាក់ ត្រូវបានធ្វើការឃាត់ខ្លួនឈ្មោះ ទីង ជឿន អាយុ៥៦ឆ្នាំ ដោយបានប្រព្រឹត្តអំពើហិង្សាទៅលើប្រពន្ធឈ្មោះ រចំ ហែន កាលពីថ្ងៃទី៣១ ខែមីនា ឆ្នាំ២០២៥ ស្ថិតនៅភូមិប៉ាអរ ឃុំកិចុង ស្រុកបរកែវ ខេត្តរតនគិរី។
ក្រោយពីបានសួរចម្លើយជនត្រូវចោទ និងបានពិនិត្យភស្តុតាងក្នុងសំណុំរឿងខាងលើរួចមក ចៅក្រមស៊ើបសួរ នៃសាលាដំបូងខេត្តរតនគិរី បានសម្រេចឃុំខ្លួនជនត្រូវចោទឈ្មោះ ទីង ជឿន ខាងលើជាបណ្តោះអាសន្ន ដើម្បីបន្តការស៊ើបសួរតាមនីតិវិធីច្បាប់។
ស្នងការនគរបាលខេត្តរតនគិរី លោកឧត្តមសេនីយ៍ទោ អ៊ុង សុភាព បានឲ្យដឹងថា ក្រោយពីទទួលបានព័ត៌មាននៃអំពើហិង្សានេះ និងក្រោមការសម្របសម្រួលពីលោក ឡុង ហុកម៉េង ព្រះរាជអាជ្ញាអមសាលាខេត្ត, លោក បានដាក់បទបញ្ជាឲ្យកម្លាំងអធិការដ្ឋាននគរបាលស្រុកបរកែវ ធ្វើការស្រាវជ្រាវ រហូតឈានដល់ឃាត់ខ្លួនបានជន សង្ស័យឈ្មោះ ទីង ជឿន អាយុ៥៦ឆ្នាំ ជនជាតិទំពួន រស់នៅភូមិប៉ាអរ ឃុំកិចុង ស្រុកបរកែវ ខេត្តរតនគិរី វេលាម៉ោង២៣៖៣៥នាទី នាថ្ងៃទី៣១ ខែមីនា ឆ្នាំ២០២៥។
ជនសង្ស័យ បានសារភាពថា ខ្លួនបានផឹកស្រាស្រវឹង ហើយបានប្រើប្រពន្ធទៅអាំងសាច់ក្លែម តែប្រពន្ធមិនទៅ ក៏បានប្រើអំពើហិង្សាវាយទៅលើប្រពន្ធ ឈ្មោះ រចំ ហែន អាយុ៣០ឆ្នាំ ពិតប្រាកដមែន៕