អភិបាលរាជធានីភ្នំពេញ ណែនាំឲ្យគិតគូរម៉ត់ចត់ទៅលើការពង្រឹង សន្តិសុខ សណ្តាប់ធ្នាប់សាធារណៈ ក្នុងឱកាសបុណ្យចូលឆ្នាំថ្មីឆ្នាំ២០២៥

(ភ្នំពេញ)៖ លោក ឃួង ស្រេង អភិបាលរាជធានីភ្នំពេញ និងជាប្រធានគណៈបញ្ជាការឯកភាពរាជធានីភ្នំពេញ បានលើកឡើងថា ការពង្រឹងសន្តិសុខ សណ្តាប់ធ្នាប់ របៀបរៀបរយសាធារណៈ ក្នុងរាជធានីភ្នំពេញ ឲ្យបានល្អប្រសើរបំផុត នាឱកាសបុណ្យចូលឆ្នាំថ្មី ប្រពៃណីជាតិខ្មែរឆ្នាំម្សាញ់ សប្តស័ក ព.ស.២៥៦៩ គ.ស.២០២៥ ជាការសំខាន់ និងអាទិភាពដែលអាជ្ញាធរខណ្ឌទាំង១៤ ត្រូវតែគិតគូរ និងយកចិត្តទុកដាក់ឲ្យបានខ្ពស់បំផុត ដេីម្បីពិធីបុណ្យចូលឆ្នាំថ្មីប្រព្រឹត្តទៅដោយរលូន និងធានាថាមិ នមានបញ្ហាកេីតឡេីង។
ក្នុងនោះ លោកអភិបាលរាជធានីភ្នំពេញ ក៏បានណែនាំដល់គណៈបញ្ជាការឯភាពខណ្ឌទាំង១៤ ក៏ដូចកម្លាំងសមត្ថកិច្ចជំនាញ ត្រូវយកចិត្តទុកដាក់ លើការល្បាតត្រួតពិនិត្យអាវុធជាតិផ្ទុះ ការត្រួតពិនិត្យជាតិអាល់កុល និងអប់រំណែនាំដល់ប្រជាពលរដ្ឋក្នុងមូលដ្ឋានរបស់ខ្លួន ឲ្យមានការប្រុងប្រយ័ត្ន និងបង្ការគ្រោះអគ្កិភ័យ កុំមានការធ្វេសប្រហែស។
លោក ឃួង ស្រេង អភិបាលរាជធានីភ្នំពេញ បានណែនាំបែបនេះ ក្នុងឱកាសដឹកនាំកិច្ចប្រជុំគណៈបញ្ជាការឯកភាពរដ្ឋបាលរាជធានីភ្នំពេញ បានបើកកិច្ចប្រជុំនៅរសៀលថ្ងៃទី៤ ខែមេសា ឆ្នាំ២០២៥នេះ ដើម្បីបន្តត្រួតពិនិត្យវឌ្ឍនភាពលើការងារសន្តិសុខ សណ្តាប់ធ្នាប់របៀបរៀបរយសាធារណៈ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែឆ្នាំ២០២៥ ដែលនឹងចូលមកដល់នាពេលឆាប់ៗ ខាងមុខ។
លោកអភិបាលរាជធានីភ្នំពេញ ជំរុញឲ្យមានការធ្វើការរួមគ្នារវាងអាជ្ញាធរ និងសមត្ថកិច្ចដោយបែងចែកកម្លាំងសមត្ថកិច្ចល្បាតទាំងថ្ងៃទាំងយប់ ដើម្បីធានាថា ពិធីបុណ្យចូលឆ្នាំថ្មីឆ្នាំនេះ ប្រព្រឹត្តទៅប្រកបដោយភាពសប្បាយរីករាយ ខណៈដែលអាជ្ញាធររំពឹងថា សង្ក្រាន្ដវត្តភ្នំឆ្នាំនេះ នឹងមានប្រជាពលរដ្ឋមកលេងកម្សាន្តសប្បាយយ៉ាងច្រើនកុះករជាងឆ្នាំមុខៗ ហើយត្រូវយកបទពិសោធន៍នាឆ្នាំកន្លងទៅ ធ្វើជាបទពិសោធន៍ និងធ្វើឲ្យបានល្អប្រសើរ។
ពាក់ព័ន្ធនឹងការដាក់កងកម្លាំងសន្តិសុខនេះ លោកអភិបាលណែនាំឲ្យរៀបចំទីបញ្ជាការស្រាលមួយចំនួន ដូចជាការដាក់ឧបករណ៍បំពងសំឡេង ដោយសហការជាមួយវិទ្យុជាតិកម្ពុជា ដើម្បីងាយស្រួលជូនដំណឹងដល់ប្រជាពលរដ្ឋដែលមកលេងកម្សាន្ត នៅរមណីយដ្ឋានប្រវត្តិសាស្រ្តវត្តភ្នំ នៅពេលមានបញ្ហាកេីតឡេីង ឬត្រូវធ្វេីការណែនាំដល់ពួកគាត់អំពីដំណឹងផ្សេងៗ។
ក្រៅពីនេះត្រូវរៀបចំចំណតរថយន្តក្រុង ឲ្យបានសមរម្យសម្រាប់ដឹកជញ្ជូនប្រជាពលរដ្ឋ មកលេងកម្សាន្តក្នុងឱកាសបុណ្យចូលឆ្នាំថ្មី ត្រូវពង្វាងចរាចរណ៍កុំឲ្យកកស្ទះនៅកន្លែងសប្បាយភាព, ត្រូវគិតគូរអំពីបរិស្ថាន ដោយត្រូវមានការសម្អាត ការទុកដាក់សំរាមឲ្យបានត្រឹមត្រូវ ដើម្បីឲ្យទីក្រុងស្អាត ជាពិសេសកន្លែងដែលប្រជាពលរដ្ឋមកលេងកម្សាន្តសប្បាយ, ត្រូវតុបតែងភ្លើងពណ៌តាមដងផ្លូវ តាមដើមឈើ លាបថ្នាំឲ្យស្រស់ស្អាត និងត្រូវត្រួតពិនិត្យចរន្តអគ្គិសនីផងដែរ កុំឲ្យចរន្តអគ្គិនីឆ្លង ឬឆក់ពលរដ្ឋដែលមកលេងច្រើន។
ម្យ៉ាងវិញទៀត លោកអភិបាលបានណែនាំជាពិសេសត្រូវធានាបាននូវសុវត្ថិផ្ទះ និងទ្រព្យសម្បត្តិរបស់ប្រជាពលរដ្ឋខណៈពួកគាត់ទៅលេងស្រុកកំណើតអស់ ដោយត្រូវដាក់កម្លាំងល្បាតជាប្រចាំ។ ចំពោះទីតាំងដែលមានពលរដ្ឋទៅលេងកម្សាន្តច្រើន កងកម្លាំងសមត្ថកិច្ច ត្រូវបង្កើនឲ្យកាន់តែច្រើនផងដែរ ដើម្បីធានាកុំមានបញ្ហាកើតឡើង។
លោកបានណែនាំដល់អាជ្ញាធរខណ្ឌទាំង១៤ ត្រូវធ្វើការផ្សព្វផ្សាយដល់ប្រជាពលរដ្ឋ ឲ្យមានការប្រុងប្រយ័ត្នចំពោះភ្លើងទៀន ធូប ចរន្តអគ្គិសនី ដែលនាំឲ្យកើតជាជាអគ្គិភ័យជាយថាហេតុ។ ចំពោះយុវជនមួយដែលលេងប៉ាតម្សៅ ជះទឹក បាញ់ទឹក ខុសទំនង ឬហួសហេតុ ដែបង្កផលប៉ះពាល់ដល់អ្នកដំណើរតាមម៉ូតូ តាមរថយន្ត តាមផ្លូវជាដើម អាជ្ញាធរ ក៏ត្រូវពនិត្យមើលផងដែរ។
ក្រោយចប់កិច្ចប្រជុំគណៈបញ្ជាការឯកភាពរដ្ឋបាលរាជធានីភ្នំពេញ លោក ឃួង ស្រេង បានអញ្ជើញចុះពិនិត្យទីតាំងព្រឹត្តិការណ៌រៀបចំ សង្ក្រាន្តវត្តភ្នំឆ្នាំ២០២៥ នៅជុំវិញរមណីយដ្ឋានវប្បធម៌ ប្រវត្តិសាស្ត្រវត្តភ្នំ និងបានណែនាំផ្នែកជំនាញ ឲ្យរៀបចំបានល្អបំផុត ពិសេសណែនាំដល់ក្រុមហ៊ុនវឌ្ឍនៈ ឲ្យសរសេរអក្សជាតិធំជាងអក្សអន្តជាតិ ហើយអក្សជាតិនៅខាងលើ ហើយដកខ្លោងទ្វាររបស់ក្រុមហ៊ុន ឲ្យឆ្ងាយពីវត្តភ្នំបន្តិច ឲ្យទៅជាប់ខាងមុខក្រសួងរ៉ែ និងថាមពលលើមហាវិថីនរោត្ដមវិញ៕