អញ្ជើញបុរសជនជាតិខ្មែរ ម្នាក់ ពាក់ព័ន្ធនឹងការបង្ហោះវីដេអូដាក់ LOGO នគរបាលក្រុងកំពង់សោមលើកម្មវិធី TIKTOK

ខេត្តព្រះសីហនុ ៖ កាលពីថ្ងៃទី៣០ ខែមីនា ឆ្នាំ២០២៥ មានគណនី TIKTOK មួយបានបង្ហោះវីដេអូដោយដាក់ LOGO របស់អធិការដ្ឋាននគរបាលក្រុងកំពង់សោមនៅលើ Profile ។ កម្លាំងនគរបាលព្រហ្មទណ្ឌ បានសហការជាមួយអធិការដ្ឋាននគរបាលក្រុងកំពង់សោមស្រាវជ្រាវយ៉ាងម៉្មត់ចត់ ។

នៅថ្ងៃទី០៣ ខែមេសា ឆ្នាំ២០២៥ វេលាម៉ោង ២១និង០០ កម្លាំងសមត្ថកិច្ចបានហៅបុរសខាងលើ នៅម្តុំដើមឈើចាំស្នេហ៍ សង្កាត់បិតត្រាំង ក្រុងកំពង់សោម ខេត្តព្រះសីហនុ មកសួរនាំនៅស្នងការដ្ឋាននគរបាលខេត្តព្រះសីហនុ ។

បុរសនេះមាន ឈ្មោះ ច្រឹង ប៊ីអែល ភេទ ប្រុស អាយុ ១៦ឆ្នាំ ជាកម្មករទឹកស្អាត មានទីលំនៅ ភូមិទួល ឃុំទឹកល្អក់ ស្រុកព្រៃនប់ ខេត្តព្រះសីហនុ ។ វត្ថុតាងមានទូរស័ព្ទដៃ iPhone ពណ៌ទឹកប្រាក់ ចំនួន ១គ្រឿង និងម៉ូតូ Honda Dream C125 ពាក់ស្លាកលេខ ព្រះសីហនុ 1L-0972 ចំនួន ១គ្រឿង ។

បុរសនេះបានរៀបរាប់ថា ក្នុងខែមករា ឆ្នាំ២០២៤ គាត់បានបង្កើតគណនី TIKTOK ឈ្មោះ “ROM” ដោយដាក់រូបខ្លួនឯងក្នុង Profile បន្ទាប់មកគាត់បានយកវីដេអូសកម្មភាពកម្លាំងសមត្ថកិច្ចចុះធ្វើការមកបង្ហោះក្នុងគណនី TIKTOK របស់ខ្លួន ។

នៅថ្ងៃទី៣០ ខែមីនា ឆ្នាំ២០២៥ គាត់បានយក LOGO នគរបាលក្រុងកំពង់សោមដាក់លើ Profile របស់ខ្លួន ហើយថតវីដេអូជាមួយមិត្តភក្តិ ដោយសម្តែងសកម្មភាពដូចជាកម្លាំងសមត្ថកិច្ចចុះបង្ក្រាបបទល្មើស បញ្ចេញនៅលើគណនី TIKTOK ដោយគ្រាន់តែមានគោលបំណង “ផុសលេង” ព្រោះស្រលាញ់ និងចង់ធ្វើជាកងកម្លាំងនគរបាលនៅពេលអនាគត ៕