ឯកឧត្តម ឈុន ពុទ្ធារិទ្ធ អគ្គនាយក អញ្ជើញចូលរួមក្នុងកិច្ចប្រជុំគណៈកម្មាធិការរួមនៃគណៈកម្មាធិការទន្លេមេគង្គ លើកទី៥៩ នៅប្រទេសឡាវ

នាថ្ងៃព្រហស្បតិ៍ ៦កើត ខែចេត្រ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៣ ខែមេសា ឆ្នាំ២០២៥ ឯកឧត្តម ឈុន ពុទ្ធារិទ្ធ អគ្គនាយកនៃអគ្គនាយកដ្ឋានកិច្ចការបច្ចេកទេសក្នុងនាមតំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម បានចូលរួមក្នុងកិច្ចប្រជុំគណ:កម្មាធិការរួម នៃគណៈកម្មការទន្លេមេគង្គ លើកទី៥៩ នៅទីក្រុងវៀងច័ន្ទន៍ ប្រទេសឡាវ ដោយមានការចូលរួមពីប្រតិភូគណ:កម្មាធិការរួម នៃប្រទេសជាសមាជិកគណៈកម្មការទន្លេមេគង្គ ផ្សេងទៀត រួមមានឡាវ ថៃ និងវៀតណាម និងមន្ត្រីលេខាធិការដ្ឋានគណៈកម្មការទន្លេមេគង្គសរុបចំនួន ៤៦នាក់។
ឯកឧត្តមអគ្គនាយក បានបញ្ជាក់ឱ្យដឹងថា កិច្ចប្រជុំបានពិនិត្យ និងពិភាក្សាវឌ្ឍនភាពការងារគណៈកម្មការទន្លេមេគង្គលើផ្នែកហិរញ្ញវត្ថុ ស្ថានភាពបុគ្គលិក ការធ្វើបច្ចុប្បន្នភាពក្របខ័ណ្ឌគាំទ្រការធ្វើសេចក្តីសម្រេចចិត្ត និងផែនការបុរេសកម្មតំបន់ ការរៀបចំការអនុវត្តសាកល្បងមូលនិធិមេគង្គផ្នែកអេកូឡូស៊ី បច្ចុប្បន្នភាពស្ថានភាពជលសាស្រ្ត និងបរិស្ថានក្នុងអាងទន្លេមេគង្គក្រោម និងកិច្ចការសំខាន់ពាក់ព័ន្ធមួយចំនួនផ្សេងទៀត៕