លោក Putin និយាយថា រុស្ស៊ីនឹងសម្រេចបានរាល់គោលដៅយោធា ប្រសិនបើអ៊ុយក្រែន មិនយល់ព្រមលើកិច្ចព្រមព្រៀង

ប្រធានាធិបតី Vladimir Putin បាននិយាយថា រុស្ស៊ីមានឆន្ទៈក្នុងការប្រយុទ្ធដើម្បីសម្រេចបានគោលបំណងទាំងអស់ ប្រសិនបើអ៊ុយក្រែន មិនយល់ព្រមធ្វើកិច្ចព្រមព្រៀង។
លោកបានថ្លែងបែបនេះ នៅក្នុងប្រទេសចិន បន្ទាប់ពីបានចូលរួមក្នុងក្បួនព្យុហយាត្រាយោធាដ៏ធំ ដែលត្រូវបានគេមើលឃើញថាជាបញ្ហាប្រឈមចំពោះលោក Donald Trump និងសណ្តាប់ធ្នាប់ពិភពលោកដែលគ្រប់គ្រងដោយសហរដ្ឋអាមេរិក។
ប្រធានាធិបតីអាមេរិកបានព្យាយាមបញ្ចុះបញ្ចូលលោក Putin ឱ្យបញ្ចប់សង្គ្រាម ប៉ុន្តែមេដឹកនាំរុស្ស៊ី ទន្ទឹមនឹងលើកសរសើរពីបំណងប្រាថ្នាដ៏ស្មោះស្ម័គ្ររបស់លោកTrump រហូតមកដល់ពេលនេះ ពុំបានបញ្ចប់ការប្រយុទ្ធគ្នានៅឡើយទេ។
ក្នុងដំណើរទស្សនកិច្ចទៅកាន់ទីក្រុង Kyiv ពីសំណាក់រដ្ឋមន្ត្រីការពារជាតិចក្រភពអង់គ្លេស លោក John Healey បានប្រាប់ទូរទស្សន៍ BBC ថា លោក Trump បាននាំលោក Putin មកកាន់តុចរចា ហើយលោកពុំបានច្រានចោលការដាក់សម្ពាធបន្ថែមលើរុស្ស៊ីនោះទេ។
លោកនិយាយថា បណ្ដាប្រទេស ដូចជាចក្រភពអង់គ្លេសជាដើម មានឆន្ទៈ ដាក់សម្ពាធសេដ្ឋកិច្ចបន្ថែមលើលោក Putin និងផ្តល់ជំនួយបន្ថែមដល់អ៊ុយក្រែន ដូច្នេះពួកគេអាចបន្តការប្រយុទ្ធបាន។
លោក Trump បានដកលោក Putin ចេញពីភាពឯកោជាអន្តរជាតិកាលពីខែមុន នៅពេលលោកធ្វើជាម្ចាស់ផ្ទះកិច្ចប្រជុំជាមួយលោក Putin នៅរដ្ឋ អាឡាស្កា។លោកក៏បានព្យាយាមបញ្ចុះបញ្ចូលលោក Putin ឱ្យជួបជាមួយប្រធានាធិបតីអ៊ុយក្រែនលោក Volodymyr Zelensky ផងដែរ។
ចំណែកលោក Putin បាននិយាយកាលពីថ្ងៃពុធសប្ដាហ៍នេះថា រូបលោកពុំដែលបដិសេធលទ្ធភាពនៃកិច្ចប្រជុំបែបនេះទេ ហើយ តែងតែត្រៀមខ្លួនជានិច្ច៕