បុរសសតិមិនប្រក្រតីម្នាក់ ដេកលើផ្លូវដែក ត្រូវរថភ្លើងកិនស្លា.ប់ ស្រុកព្រៃនប់

ខេត្តព្រះសីហនុ ៖ បុរសម្នាក់ ត្រូវរថភ្លើងកិនស្លាប់នៅនឹងកន្លែង ក្នុងខណៈបុរសរូបនោះ បានដេកនៅលើផ្លូវរថភ្លើង។ ហេតុការណ៍នោះបានកើតមានឡើងនៅវេលារសៀលថ្ងៃទី០៤ ខែតុលា ឆ្នាំ២០២៥ លើដងផ្លូវដែក ស្ថិតក្នុងភូមិអូរត្រជាក់ចិត្ត ឃុំសំរុង ស្រុកព្រៃនប់ ខេត្តព្រះសីហនុ ។

ករណីគ្រោះថ្នាក់ចរាចរណ៍នេះ បានកើតឡើងរវាងរថភ្លើង០១ខ្សែ ប្រភេទដឹកអ្នក ដំណើរ ដែលធ្វើដំណើរក្នុងទិសដៅពីខេត្តព្រះសីហនុ ឆ្ពោះទៅរាជធានីភ្នំពេញ និងអ្នកបើកបរ (មិនទាន់ស្គាល់អត្តសញ្ញាណ) ។ លុះមកដល់ចំណុចខាងលើ បានបុក និងកិនបុរសម្នាក់ ឈ្មោះ ហែម រិន អាយុ៣២ឆ្នាំ (មានសតិមិនប្រក្រតី) មានទីលំនៅភូមិចំការកៅស៊ូ ឃុំជើងគោ ស្រុកព្រៃនប់ ខេត្តព្រះសីហនុ ដែលកំពុងដេកលើផ្លូវដែក តែម្ដង ។
សមត្ថកិច្ចបានបន្តថា ករណីគ្រោះថ្នាក់ចរាចរណ៍នេះ បណ្ដាលអោយបុរសម្នាក់ស្លាប់នៅនឹងកន្លែងកើតហេតុ ។ សាកសពត្រូវបានក្រុមគ្រួសារយកទៅធ្វើបុណ្យតាមប្រពៃណី ចំណែករថភ្លើង ត្រូវបានអ្នកបើកបរបន្ដដំណើរទៅមុខបាត់ ៕