ថៃ គំរាមមិនចុះកិច្ចព្រមព្រៀងសន្តិភាពជាមួយកម្ពុជា បើការប្រជុំ GBC-JBC អត់ទទួលជោគជ័យ

ប្រទេសថៃ បានគំរាមមិនចុះហត្ថលេខាលើកិច្ចព្រមព្រៀងសន្តិភាពជាមួយកម្ពុជាឡើយ ប្រសិនបើកិច្ចប្រជុំ GBC-JBC មិនទទួលបានជោគជ័យទេនោះ។
ការគំរាមនេះគឺចេញពីមាត់រដ្ឋមន្ត្រីការពារជាតិថៃលោក Natthaphon Narkphanit នៅថ្ងៃអង្គារទី២១ខែតុលាឆ្នាំ២០២៥ និងផ្សាយដោយសារព័ត៌មាន Khaosod។
លោក Natthaphon គំរាមយ៉ាងព្រហើនថា ប្រសិនបើកិច្ចប្រជុំ GBC-JBC មិនជោគជ័យទេនោះ នាយករដ្ឋមន្ត្រីថៃនឹងមិនចុះហត្ថលេខាលើកិច្ចព្រមព្រៀងសន្តិភាពឡើយ ហើយក៏នឹងមិនមានកិច្ចប្រជុំទៀតដែរ ព្រោះវាខ្ជះខ្ជាយលុយ ខណៈអ្វីៗក៏អាចកើតឡើងដែរ។
ទោះបីជាយ៉ាងណាក៏ដោយ ការគំរាមនេះ បានបង្ហាញយ៉ាងច្បាស់ថា ថៃស្រឡាញ់សង្គ្រាម មិនចង់បានសន្តិភាព ហើយក៏មិនឲ្យតម្លៃនិងកិត្តិយសដល់ប្រទេសម៉ាឡេស៊ី ដែលជាប្រធានអាស៊ានឆ្នាំ២០២៥ និងប្រធានាធិបតីអាមេរិក ដូណាល់ ត្រាំ ដែលខិតខំយ៉ាងខ្លាំងក្នុងការនាំយកសន្តិភាពជូនភាគីទាំងពីរ។
សូមជម្រាបជាថ្មី លោក ត្រាំ នឹងធ្វើដំណើរមកកាន់ប្រទេសម៉ាឡេស៊ី ដើម្បីចូលរួមជាអធិបតីដោយផ្ទាល់ ក្នុងពិធីចុះហត្ថលេខាលើកិច្ចព្រមព្រៀងសន្តិភាពកម្ពុជា-ថៃ។
បើតាមការបញ្ជាក់យ៉ាងច្បាស់ពីសំណាក់រដ្ឋមន្ត្រីការបរទេសម៉ាឡេស៊ី Mohamad Hasan អំឡុងសន្និសីទកាសែតក្នុងទីក្រុងគូឡាឡាំពួ កាលពីថ្ងៃអង្គារទី១៤ខែតុលាឆ្នាំ២០២៥, មេដឹកនាំអាមេរិកនឹងមកចូលរួមកិច្ចប្រជុំកំពូលអាស៊ាននាពេលខាងមុខ ហើយធ្វើជាអធិបតីក្នុងពិធីចុះហត្ថលេខាលើ «កិច្ចព្រមព្រៀងគូឡាឡាំពួ»។
កិច្ចប្រជុំកំពូលអាស៊ានលើកទី៤៧ ក្នុងទីក្រុងគូឡាឡាំពួ នឹងប្រព្រឹត្តទៅនៅថ្ងៃទី២៦-២៨ ខែតុលា៕