ប្រមុខការទូតកម្ពុជា ស្នើអាស៊ានពិនិត្យលើ ៣ចំណុច ដើម្បីដោះស្រាយភាពតានតឹងក្នុងតំបន់

(ភ្នំពេញ)៖ យោងតាមសេចក្ដីប្រកាសលទ្ធផលនៃកិច្ចប្រជុំចង្អៀតរដ្ឋមន្ត្រីការបរទេសអាស៊ាន បានឱ្យដឹងថា លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានលើកឡើង៣ចំណុចសំខាន់ទៅអាស៊ាន ដើម្បីដោះស្រាយភាពតានតឹងក្នុងតំបន់។
នៅក្នុងកិច្ចប្រជុំ លោកឧបនាយករដ្ឋមន្ត្រី បានកត់សម្គាល់ថា មូលបទ និងអាទិភាពរបស់ វិបុលភាពក្នុងតំបន់កំពុងត្រូវបានសាកល្បងដោយបញ្ហាប្រឈមដែលស្មុគស្មាញ និងមានភាពប្រទាក់ក្រឡាគ្នាជាច្រើន។
ដូច្នេះ អាស៊ានត្រូវតែដោះស្រាយភាពតានតឹងផ្នែកភូមិសាស្ត្រនយោបាយ និងផ្ទៃក្នុង ការប្រែប្រួលបច្ចេកវិទ្យាយ៉ាងឆាប់រហ័ស ហានិភ័យអាកាសធាតុ និងការផ្លាស់ប្តូរសង្គម-សេដ្ឋកិច្ចដ៏ធំ។ នៅក្នុងបរិបទនេះ លោកឧបនាយករដ្ឋមន្ត្រីបានលើកឡើងអាទិភាពបី។
*ទីមួយ៖ ការពង្រឹងពាណិជ្ជកម្ម និងវិនិយោគនៅក្នុងអាស៊ាន និងជាមួយដៃគូខាងក្រៅនៅតែមានសារៈសំខាន់ចំពោះវិបុលភាពរួម រួមទាំងតាមរយៈការធ្វើទំនើបកម្មកិច្ចព្រមព្រៀងពាណិជ្ជកម្មសេរី ដែលមានស្រាប់
*ទីពីរ៖ អាស៊ានត្រូវពង្រឹងការតភ្ជាប់ក្នុងតំបន់ និងជំរុញការអភិវឌ្ឍបណ្តាញអគ្គិសនីអាស៊ាន
*ទីបី៖ អាស៊ានត្រូវពង្រឹងអំណាចសហគ្រាសមីក្រូធុនតូច និងមធ្យម (MSMEs) តាមរយៈការកសាងសមត្ថភាព ការកែលម្អការទទួលបានហិរញ្ញវត្ថុ និងការទទួលយកបច្ចេកវិទ្យាថ្មីៗ ដើម្បីបង្កើនផលិតភាព និងសមត្ថភាពប្រកួតប្រជែង ដោយធានាថា ប្រជាជនអាស៊ានទទួលបានអត្ថប្រយោជន៍ពីការធ្វើសមាហរណកម្មកាន់តែស៊ីជម្រៅ និងវិស័យដែលមានកំណើនថ្មីៗ៕