កងរាជឣាវុធហត្ថខេត្ត បញ្ជូនក្មេងទំនើងកាប់បំផ្លាញម៉ូតូចំនួន៣នាក់ ទៅសាលាដំបូង

ត្តបន្ទាយមានជ័យៈ ជនសង្ស័យ៣នាក់ត្រូវបានកម្លាំងការិយាល័យព្រហ្មទណ្ឌកងរាជអាវុធហត្ថខេត្តបញ្ជូនទៅសាលាដំបូងខេត្តហើយ នៅថ្ងៃសៅរ៍ ទី០១ ខែសីហា ឆ្នាំ២០២៦ម្សិលមិញនេះ ដើម្បីអនុវត្តតាមនីតិវិធី ។
សមត្ថកិច្ចបន្តថា នៅថ្ងៃទី២៣ ខែកក្កដា ឆ្នាំ២០២៦ កម្លាំងជំនាញមូលដ្ឋានកងរាជអាវុធហត្ថក្រុងប៉ោយប៉ែតបានទទួលពាក្យបណ្តឹងរបស់ជនរងគ្រោះចំនួន០២នាក់ ឈ្មោះស៊ីន យ៉ុងឈីន ភេទប្រុស អាយុ២០ឆ្នាំ រស់នៅភូមិផ្សារកណ្តាល សង្កាត់ផ្សារកណ្ដាល ក្រុងប៉ោយប៉ែត និងឈ្មោះ អៀន សុវណ្ណារ៉ា ភេទប្រុស អាយុ១៦ឆ្នាំ រស់នៅភូមិក្បាលកោះ សង្កាត់អូរជ្រៅ ក្រុងប៉ោយប៉ែត ស្តីពីករណីធ្វើឲ្យខូចខាតដោយចេតនា (កាប់បំផ្លាញម៉ូតូ) ដែលប្រព្រឹត្តកាលពីវេលាម៉ោង១៩ និង១៦នាទី ថ្ងៃទី២២ ខែកក្កដា ឆ្នាំ២០២៦ នៅចំណុច បុរី KN ស្ថិតក្នុងភូមិគីឡូលេខ៤ សង្កាត់ផ្សារកណ្ដាល ក្រុងប៉ោយប៉ែត បង្កឡើងដោយជនសង្ស័យជាក្រុមក្មេងទំនើងចំនួន០១ក្រុមមានរហស្សនាម “ជើងកន្រ្តៃហោះ”(JKH) បានធ្វើសកម្មភាពប្រើកំបិតផ្គាក់ដេញកាប់មកលើជនរងគ្រោះខាងលើដែលជាគូទំនាស់កន្លងមក ខណៈពេលដែលក្រុមជនរងគ្រោះកំពុងអង្គុយលេងនៅចំណុចកើតហេតុខាងលើ។ ក្រោយពីទទួលបានបណ្តឹងរបស់ជនរងគ្រោះ លោកអនុសេនីយ៍ឯកតិល តៃលីវ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានដឹកនាំកម្លាំងជំនាញចុះដល់ទីតាំងកើតហេតុខាងលើនិងបានធ្វើការស្រាវជ្រាវ កំណត់មុខសញ្ញាជនសង្ស័យដែលប្រព្រឹត្តបទល្មើសខាងលើរហូតដល់វេលាម៉ោង១៩និង៣០នាទី ថ្ងៃទី២៩ ខែកក្កដា ឆ្នាំ២០២៦ បានឃាត់ខ្លួនជនសង្ស័យជាបន្តបន្ទាប់ចំនួន០២នាក់ ក្នុងចំណោមបក្ខពួកចំនួន០៥នាក់ ដែលមានឈ្មោះ សោម បញ្ញាបុត្រ ភេទប្រុស អាយុ១៨ឆ្នាំ និងឈ្មោះនួន វីហ្សា (សា) ភេទប្រុស អាយុ១៨ឆ្នាំ នៅចំណុចស្តង់ព្រះអាទិត្យ ស្ថិតក្នុងភូមិគីឡូលេខ៤ សង្កាត់ផ្សារកណ្តាល ក្រុងប៉ោយប៉ែត និងបន្តឃាត់ខ្លួនម្នាក់ទៀតឈ្មោះ ហៀក ឈៀកឡេង ភេទប្រុស អាយុ១៧ឆ្នាំ ចំណែកបក្ខពួកផ្សេងទៀតបានរត់គេចខ្លួន ព្រមទាំងដកហូតវត្ថុតាង ម៉ូតូសម្រាប់ធ្វេីសកម្មភាពចំនួន២គ្រឿង ហើយនាំមកមូលដ្ឋានកងរាជអាវុធហត្ថក្រុងដើម្បីសួរនាំនិងចាត់ការតាមនីតីវិធី ព្រមទាំងបានធ្វើតេស្តទឹកនោមរបស់ជនសង្ស័យរកសារធាតុញៀនជាលទ្ធផលវិជ្ជមាន (+) ។
លោកអនុសេនីយ៍ឯកតិល តៃលីវ មេបញ្ជាការមូលដ្ឋានកងរាជអាវុធហត្ថក្រុងបានឱ្យដឹងថា ក្រោយសួរនាំ រកឃើញថាមានភាពស៊ីចង្វាក់ និងមានតម្រុយពិរុទ្ធភាពនៃបទល្មើសពាក់ព័ន្ធករណីធ្វើឲ្យខូចខាតដោយចេតនានិងប្រើប្រាស់ដោយខុសច្បាប់នូវសារធាតុញៀន ទើបកសាងសំណុំរឿងបញ្ជូនមកកាន់បញ្ជាការដ្ឋានកងរាជអាវុធហត្ថខេត្តចាត់ការបន្តតាមនីតិវិធី។
លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវនិងបង្ក្រាបបទល្មេីសបានឱ្យដឹងថា ការបង្ក្រាបករណីខាងលើនេះ ក៏ទទួលបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពី ឯកឧត្តម កើត វណ្ណារ៉េត ព្រះរាជអាជ្ញា អមសាលាដំបូងខេត្តផងដែរ។
ជនសង្ស័យត្រូវបានកម្លាំងការិយាល័យព្រហ្មទណ្ឌកងរាជអាវុធហត្ថខេត្តបញ្ជូនទៅសាលាដំបូងខេត្តដើម្បីអនុវត្តតាមនីតិវិធី៕