ព្រះសង្ឃ និងពលរដ្ឋខ្មែរ មានដើមកំណើតខ្មែរក្រោម បន្តផ្សារភ្ជាប់សុខទុក្ខជាមួយកងទ័ព និងនគរបាល
(បាត់ដំបង)៖ បេះដូងត្របាញ់ដោយមនោសញ្ចេតនា និងការយកអាសាគ្នា បានជំរុញឱ្យព្រះសង្ឃ និងពលរដ្ឋខ្មែរមានដើមកំណើតខ្មែរក្រោម ចុះធ្វើសកម្មភាពផ្សារភ្ជាប់សុខទុក្ខជាមួយកងទ័ព នគរបាល និងប្រជាពលរដ្ឋខ្មែរជាហូរហែ។
នៅព្រឹកថ្ងៃទី៥ ខែវិច្ឆិកា ឆ្នាំ២០២៦នេះ លេខាធិការដ្ឋាននៃអង្គការសមាគមខែ្មរក្រោម ដែលមាន៩សមាគមខ្មែរក្រោមជាមាជិក ដឹកនាំដោយ លោក សឺន យឿង រួមនិងបងប្អូនខ្មែរដើមកំណើតខ្មែរក្រោម ព្រះសង្ឃខ្មែរដេីមកំណើតខ្មែរក្រោមចំនួន៩អង្គ និមន្តមពីវត្តអង្គតាមិញ វត្ត សាមគ្គីរង្សី វត្តបុទុមវតី និងវត្តនាគវ័ន្ត និងព្រះកោសលវិទូ បណ្ឌិត ទេព្យ កុសល ប្រធានមូលនិធិមេត្តាធម៌កម្ពុជា និងមានការចូលរួមពីក្រុមគ្រួសារអ្នកឧកញ៉ា យូរ សាម៉េត ទីប្រឹក្សាសម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងមានការសម្របសម្រួលដោយ ក្រុមការងាររបស់លោក សាន សាង ទីប្រឹក្សាសម្តេចតេជោ ហ៊ុន សែន ប្រធានព្រឹទ្ធសភា បាននាំយកអំណោយមកជូនវិរៈកងទ័ពនៅទីបញ្ជាការទិសទី២ជួរមុខ នៃយោធភូមិភាគទី៥ ខេត្តបាត់ដំបង។
អំណោយដែលយកចែកជូននាពេលនោះរួមមាន៖ អង្ករ ៣តោន និងមុីជាតិ ចំនួន ១១៤កេស ទឹកត្រី ១៣០យួរ ទឹកសុីអុីវ ១៣០យួរ ទឹកបរិសុទ្ធ រួមនឹងទឹកក្រូច ទឹកផ្លែឈើ ១៥០កេស ហើយមានអាហារសាមគ្គីជាមួយវិរៈកងទ័ពចំនួន១៧តុ។
ក្នុងពិធីជូនអំណោយនេះ ក៏មានការចូលរួមទទួលស្វាគមន៍យ៉ាងកក់ក្ដៅពីឧត្ដមសេនីយ៍ឯក ព្រហ្ម មរណៈ មេបញ្ជាការរងកងទ័ពជើងគោក និងជាប្រធានគណៈបញ្ជាការសមរភូមិមុខទិសទី២ យុទ្ធភូមិភាគទី៥។
ថ្លែងសំណេះសំណាលនៅក្នុងឱកាសនោះ លោក សាន សាង បានគូសរំលេចថា ព្រះសង្ឃ និងប្រជាពលរដ្ឋខ្មែរ មានដើមកំណើតខ្មែរក្រោម តែងតែគិតគូរ និងនឹករលឹកជាប់ជានិច្ចចំពោះកងទ័ព និងនគរបាល ដែលបានឈរជើងការពារជាតិ និងទឹកដីប្រកបដោយឆន្ទៈមនសិការខ្ពស់។ ដើម្បីជាការចូលរួមដល់កិច្ចការពារជាតិ និងទឹកដីនេះ ព្រះសង្ឃ និងប្រជាពលរដ្ឋខ្មែរមានដើមកំណើតខ្មែរក្រោម បានធ្វើសកម្មភាពជាបន្តបន្ទាប់ក្នុងការនាំស្បៀងអាហារ និងរៀបចំអាហារជូនដល់កងទ័ព។
សម្រាប់លោក សាន សាង សកម្មភាពទាំងនេះ បង្ហាញច្បាស់ពីការវិញត្របាញ់ចូលគ្នារវាងខ្មែរមានដើមកំណើតខ្មែរក្រោម និងប្រជាពលរដ្ឋខ្មែរក្នុងការរួមគ្នារវាងសមរភូមិមុខ និងក្រោយលើកិច្ចការពារទឹកដី៕
