មន្រ្តីអន្តរក្រសួង ចុះពិនិត្យកិច្ចការរៀបចំភូមិហ្រ្វង់កូហ្វូនី ខណៈពិធីបើកនៅសល់ពីរថ្ងៃទៀត
មន្រ្តីអន្តរក្រសួងដូចជា ក្រសួងទេសចរណ៍ ក្រសួងកិច្ចការនារី ក្រសួងព័ត៌មាន និងក្រសួងវប្បធម៌ និងវិចិត្រសិល្បៈជាដើមនោះ នៅព្រឹកថ្ងៃទី១១ ខែវិច្ឆិកា ឆ្នាំ២០២៦នេះ បានចុះពិនិត្យទីតាំងរៀបចំភូមិហ្រ្វង់កូហ្វូនី ខណៈការរៀបចំសម្រេចបានជាង៩០ភាគរយ។
ភូមិហ្វ្រង់កូហ្វូនីដែលជាព្រឹត្តិការណ៍អមកិច្ចប្រជុំកំពូលហ្វ្រង់កូហ្វូនីលើកទី២០ នឹងចាប់បើកឲ្យភ្ញៀវទេសចរជាតិ និងអន្តរជាតិចូលទស្សនា ពីថ្ងៃទី១៣ រហូតដល់ថ្ងៃទី១៧ ខែវិច្ឆិកា ឆ្នាំ២០២៦ ដោយមានការបង្ហាញលើសិល្បៈ វប្បធម៌ កិច្ចសហប្រតិបត្តិការ និងសាមគ្គីភាព រវាងព្រះរាជាណាចក្រកម្ពុជា និងបណ្តាប្រទេសនិយាយភាសាបារាំង តាមរយៈការរៀបចំជាពន្លាជាតិ, ស្តង់ពិព័រណ៌, ស្តង់ពិព័រណ៌ម្ហូបអាហារ, ការសម្តែងសិល្បៈចម្រុះប្រចាំថ្ងៃ និងការរៀបចំជាកិច្ចសន្ទនា សិក្ខាសាលា លើប្រធានបទគន្លឹះៗ មានជាអាទិ៍ ការលើកកម្ពស់វិស័យទេសចរណ៍ ការអប់រំ យុវជន សមភាពយេនឌ័រ សន្តិភាព ការអភិរក្សបេតិកភណ្ឌវប្បធម៌។ល។ ភូមិហ្រ្វង់កូហ្វូនីរៀបចំឡើងក្រោមប្រធាន «ស្នាមញញឹមខ្មែរ ស្នាមញឹមហ្រ្វង់កូហ្វូនី»។
គួរបញ្ជាក់ដែរថា សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា អមដំណើរដោយលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត និងលោកជំទាវអគ្គលេខាធិការ នៃអង្គការ OIF នឹងអញ្ជឹងចូលរួមជាគណៈធិបតីបើកព្រឹត្តិការណ៍ «ភូមិហ្រ្វង់កូហ្វូនី» ជាផ្លូវការ នៅល្ងាចថ្ងៃទី១៣ខែវិច្ឆិកា ឆ្នាំ២០២៦។ តាមការប៉ាន់ស្មាន ព្រឹត្តិការណ៍ភូមិហ្រ្វង់កូហ្វូនី នឹងអាចទាក់ទាញភ្ញៀវទេសចរជាតិ និងអន្តរជាតិ ព្រមទាំងគណៈប្រតិភូមកចូលរួមកិច្ចប្រជុំកំពូលហ្វ្រង់កូហ្វូនី ទៅទស្សនាភូមិហ្រ្វង់កូហ្វូនី សរុបប្រមាណ១០ម៉ឺននាក់៕
