អាជ្ញាធរឡាវ បង្ក្រាបបណ្តាញជនជាតិថៃ ឆបោកអនឡាញចំនួន ៩ នាក់ ប្រើប្រាស់អាជីវកម្មលក់ដុំជាលេសសម្រាប់បិទបាំងសកម្មភាពផ្តល់កម្ចីខុសច្បាប់ និងការឆបោកតាមអនឡាញ ព្រមទាំងដកហូតបានឧបករណ៍អេឡិចត្រូនិចជាច្រើន
យោងតាមសេចក្តីរាយការណ៍ពីទីក្រុងវៀងចន្ទន៍ សាធារណរដ្ឋប្រជាធិបតេយ្យប្រជាមានិតឡាវ (ស.ប.ប.ឡាវ) ក្រុមការងារពិសេសមកពីក្រសួងសន្តិសុខសាធារណៈឡាវ ដោយសហការជាមួយស្ថាប័នពាក់ព័ន្ធ បានធ្វើប្រតិបត្តិការស៊ើបអង្កេត និងបង្ក្រាបបណ្តាញឧក្រិដ្ឋកម្មមួយ។ ជនជាតិថៃចំនួន ៩ នាក់ត្រូវបានឃាត់ខ្លួន បន្ទាប់ពីរកឃើញថាពួកគេបានប្រើប្រាស់អាជីវកម្មលក់ដុំមួយកន្លែង ជាលេសដើម្បីបិទបាំងសកម្មភាពផ្តល់កម្ចីខុសច្បាប់ និងការឆបោកតាមប្រព័ន្ធអនឡាញ។
ប្រតិបត្តិការនេះបានធ្វើឡើងនៅថ្ងៃទី ១៣ ខែវិច្ឆិកា ឆ្នាំ ២០២៤ នៅភូមិដុងខាំសាង (Dong Kham Xang) ស្រុកហាតសៃហ្វុង (Hadxaifong) ទីក្រុងវៀងចន្ទន៍។ អាជ្ញាធរបានចុះឆែកឆេរទីតាំងគោលដៅនោះ បន្ទាប់ពីមានការសង្ស័យថា អាជីវកម្មលក់ដុំនេះត្រូវបានប្រើប្រាស់ដើម្បីលាក់បាំងសកម្មភាពខុសច្បាប់ ជាពិសេសគឺការផ្តល់កម្ចីដោយខុសច្បាប់ និងការឆបោកតាមអនឡាញ។
ក្នុងអំឡុងពេលឆែកឆេរ អាជ្ញាធរបានដកហូតវត្ថុតាង និងឧបករណ៍ជាច្រើនដែលពាក់ព័ន្ធនឹងបទល្មើស រួមមាន ទូរសព្ទដៃចំនួន ១៤ គ្រឿង, កុំព្យូទ័រលើតុចំនួន ៥ គ្រឿង, ថេប្លេត iPad ចំនួន ១ គ្រឿង, ម៉ូតូចំនួន ៦ គ្រឿង, បារីអេឡិចត្រូនិកចំនួន ៣ គ្រឿង និងកុំព្យូទ័រយួរដៃចំនួន ១ គ្រឿង ព្រមទាំងឧបករណ៍អេឡិចត្រូនិកផ្សេងទៀត ដែលអាចមានផ្ទុកព័ត៌មានសំខាន់ៗសម្រាប់ការស៊ើបអង្កេតដែលកំពុងបន្ត។
ក្រោយប្រតិបត្តិការនេះ ជនជាតិថៃទាំង ៩ នាក់ត្រូវបានឃាត់ខ្លួន រួមជាមួយវត្ថុតាងដែលដកហូតបាន ដើម្បីចាត់ការតាមនីតិវិធីច្បាប់បន្តទៀត។ បច្ចុប្បន្ន អ្នកស៊ើបអង្កេត និងអ្នកជំនាញបច្ចេកទេស កំពុងវិភាគទិន្នន័យពីឧបករណ៍អេឡិចត្រូនិកទាំងនោះ ដើម្បីកំណត់ថាតើមានបុគ្គលផ្សេងទៀតពាក់ព័ន្ធនឹងបណ្តាញនេះដែរឬទេ។ ការងារនេះរួមបញ្ចូលទាំងការស៊ើបអង្កេតលើរចនាសម្ព័ន្ធបណ្តាញ និងវិធីសាស្ត្រប្រតិបត្តិការរបស់ក្រុមនេះ។
អាជ្ញាធរកំពុងបន្តការស៊ើបអង្កេត និងប្រមូលភស្តុតាង ដើម្បីចោទប្រកាន់ និងដាក់ទោសទណ្ឌលើជនល្មើសទាំងនោះ ស្របតាមច្បាប់នៃសាធារណរដ្ឋប្រជាធិបតេយ្យប្រជាមានិតឡាវយ៉ាងតឹងរ៉ឹង។






